काठमाडौं । साबिकको बिजेता म्यानचेस्टर युनाइटेड इंग्लिश फुटबल लिग कप (कारबाओ कप) फुटबलको चौथो चरणमा प्रवेश गरेको छ । लिग कप अन्तर्गत बुधबार राती भएको तेस्रो चरणमा बर्टन एल्बियनलाई ४ – १ ले पराजित गर्दै युनाइटेडले अन्तिम १६ मा स्थान बनाएको हो ।

घरेलु मैदानमा युनाइटेडलाई जित दिलाउन मार्कुस राष्फोर्डले दुई तथा जेसे लिंगार्ड र एन्थोनी मार्सियलले समान एक एक गोल गरे ।  बर्टन एल्बियनका लोयड डायरले एक गोल फर्काए । अब युनाइटेडले क्वाटरफाइनलमा प्रवेशको लागि स्वान्सी सिटीसँग उसैको मैदानमा खेल्ने छ ।

ओल्ड ट्राफोर्डमा खेलको पाँचौ मिनेटमा राष्फोर्डको गोलबाट युनाइटेडले सुरुवाती अग्रता बनाएको थियो । खेलको १७ औं मिनेटमा राष्फोर्डले व्यक्तिगत दोस्रो गोल गर्दै युनाइटेडको अग्रता दोब्बर बनाए ।  ३६ औं मिनेटमा लिंगार्डले एक गोल गर्दै युनाइटेडलाई पहिलो हाफमा ३ (  ०  को अग्रता दिलाए ।

दोस्रो हाफमा युनाइटेडले एक गोल गर्दा एक गोल बेहोर्न पुग्यो ।  खेलको ६० औं मिनेटमा मार्सियलले गोल गर्दै युनाइटेडको अग्रता ४ – ० को बनाए ।  खेलको ९० औं मिनेटमा एल्बियनका लोयड डायरले सान्त्वना गोल फर्काए ।  त्यसपछि दुवै टोलीले थप गोल गर्न सकेनन र खेल युनाइटेडले ४ – १ ले आफ्नो बनायो ।

लिग कप अन्तर्गत नै म्यानचेस्टर सिटीले वेष्ट ब्रुमलाई २ – १  ले पराजित गर्दै चौथो चरणमा स्थान बनाएको छ । सिटीको जितमा दुवै गोल लोरी सानेले गरेका थिए । वेष्ट ब्रुमका क्लाउडियो याकोबले एक गोल फर्काए  । अब सिटीले अर्को चरणमा वुल्भ्सको सामना गर्नेछ ।