काठमाडौं । शुक्रबार अपरान्ह ललितपुरको कुपन्डोलस्थित ब्रिक्स क्याफेमा हास्य कलाकार शिवहरि पौडेलले वरिष्ठ हास्य कलाकार मदनकृष्ण श्रेष्ठलाई आसनग्रहणका लागि मञ्चमा बोलाए । शारीरिक अस्वस्थतामहसुस गरिरहेका श्रेष्ठ मञ्चमा गएर बस्दैथिए । शिवहरिलले आसन ग्रहणका लागि भूमिका बाँधेर अर्को नाम बोलाउन खोज्दैथिए, ‘मै त हो नि’ भन्दै हरिवंश मञ्चमा गएर आसिन भए । शिवहरिले नाम भनिसक्दा उनी मञ्चमा गएर बसिसकेका थिए । कार्यक्रममा सहभागी सबै हाँसे । सहभागीको हाँसोमै मिसियो उनका छोरा मोहित र श्रीमती रमिलाको हाँसो पनि । यही त हो उनको विशेषता जहाँ जस्तो परिस्थितिमा पनि हँसाउन सक्नु ।
कार्यक्रम थियो ३७वर्षअघि स्थापना भएको महसञ्चारले बनाउन लागेको चलचित्र निर्माणको घोषणा । शिवहरिले चलचित्र निर्माणको घोषणा गर्दै चलचित्र निर्माण युनिटबारे जानकारी दिए । निर्देशक र निर्मातासँगै कलाकारको नाम भने । बोल्न आग्रह गरे उनै हास्य अभिनेता आचार्यलाई । हल्का हरियो सर्ट र सेतो पाइन्टमा ठाँटिएका उनले बडो शालिन शैलीमा बोल्न थाले । ३७ वर्ष पुरानो महसञ्चारले १७ वर्षअगाडि निर्माण गरेको चलचित्र ‘तँ त साह्रै बिग्रिस्नि बद्री’ बनाउँदाको समयकाललाई सम्झिँदै भने, “हामीले केही नगन्य चलचित्र पनि बनाएका छौं । जुन बेला हामीले ‘तँ त साह्रै विग्रिस् नि बद्री’ बनायौं, त्यो बेला चलचित्रको बजार राम्रो थियो । पछि देशमा द्वन्द्व सुरु भयो । चलचित्रको बजार नराम्रो हुँदै गयो । हामीले ‘जे भो राम्रै भो’ बनायौं । त्यो पनि रामै्र भयो, घाटामा गएनौं ।”
उनले अगाडि थप्दै गए, “बीचमा हामीले केही टेलिचलचित्र बनायौं। रंगमञ्चमा काम गर्यौं । त्यसैले चलचित्रबाट केही पर रह्यौं तर हामी यही दुनियाँमा नै छौं, कतै गएका छैनौं ।”
उनलाई अहिले नेपाली चलचित्रले रंग फेरेजस्तो लाग्न थालेको छ । पहिला हलहरु गतिला नभएकाले नेपाली चलचित्र हेर्न जान मान्छेहरु हिचकिचाउने गरेको उनले सम्झिए । समयसँगै गुणस्तरीय हलहरु निर्माण हुँदै गएको र चलचित्र पनि गुणस्तरीय बन्न थालेको उनले सुनाए ।
उनी २० वर्षअगाडिका चलचित्र सम्झिँदै नोस्टाल्जिक भए । “२० वर्ष अगाडिका चलचित्र एउटा हिरो, एउटी हिरोइन, एउटा भिलेन, ५ वटा गीत, एउटा हास्य कलाकार र उसको जोडी राखेर बन्थे,” हरिवंशलाई अहिलेका चलचित्रले काँचुली फेरे जस्तो लाग्न थालेको छ, “हामीले त्यो बेला बनाएका १५ गते, सुरबेसुर, लालपूर्जा अहिले बनेका अलग धारका चलचित्र जस्तै थिए । हामीले त्यो बेला नै अलग धारका चलचित्र बनाउन सुरु गरिसकेका रहेछौं । त्यसलाई चलचित्र भन्ने चलन थिएन । साना पर्दामा देखाएका मात्रै रहेछौं । अहिले मन पराइएको भनिएका अलग धारका चलचित्र सँगै हामी पनि मिसिएर अहिलेका नयाँ कलाकार र निर्देशकहरुसँग काम गर्नसक्यौं भने हाम्रो पनि आयु लामो हुनेछ ।”
कलाको क्षेत्रमा नयाँ उचाइ ग्रहण गरेका हरिवंशले निर्र्धक्कसँग भने, “हामीले पनि नयाँ पुस्तासँग नयाँ कुरा सिक्दै अगाडि बढ्नु छ ।”
उनीहरुले बनाउन लागेको चलचित्र ‘सत्रुगते’ का निर्देशक प्रदीप भट्टराईको पनि खुलेर प्रशंसा गरे । उनलाई आफ्नो ब्यानरबाटै निर्देशकमा डेब्यू गराउन चाहेको भए पनि विभिन्न कारणवश ढिलो हुँदा उनका लागि ‘सत्रुगते’ दोस्रो चलचित्र बन्न पुगेको स्पष्ट पारे ।
चलचित्रले मनोरञ्जनसँगै केही सन्देश पनि दिने उनले बताए । हिमाल, पहाड र तराईलाई जोड्ने चलचित्र बनाउन लागेको स्पष्ट पारेका आचार्यले निर्देशकले भन्दैमा राम्रो चलचित्र बन्न नसक्ने पनि बताए ।
“निर्देशकले राम्रो चलचित्र बनाउँछु भनेर ग्यारेन्टी गर्न कहिले पनि सक्तैन । उसले मेहनत गर्ने हो । हामी मेहनत गर्न भने छोड्दैनौं । चलचित्र भनेको जुवा रहेछ र लक पनि रहेछ,” उनले आफ्नो अनुभव सुनाए, “हामी राम्रो चलचित्र बनाउन मेहनत गर्नेछौं । हामी अर्को वर्ष तपाईंहरुलाई राम्रो चलचित्र दिन सकौं । यसका लागि हामी मेहनत गर्नेछौं । यहाँहरुको आशिर्वाद लागोस् ।”
उनले पटक–पटक दर्शकको आशिर्वाद मागे । आशिर्वाद रहने विश्वास गरे र आशिर्वाद पाउनका लागि मेहनत गर्ने प्रतिबद्धता जनाए ।
हरिवंश भन्दा अगाडि किरण केसीले भनेका थिए, “हाम्रो चलचित्रको एउटै उद्देश्य हुनेछ– मनोरञ्जन, मनोरञ्जन र मनोरञ्जन । सँगै पैसा कमाउनु ।” किरण केसीको भनाइलाई हरिवंबले खण्डन गरे, “हाम्रो मुख्य उद्देश्य नेपालमा एउटा राम्रो चलचित्र बनेछ भनेर नम्बर दिन सुरुआत गर्नेछौं । राम्रो चलचित्र बन्यो भने पैसा आउने रहेछ भन्ने प्रमाणित भइसकेको छ ।”
अन्तिममा फेरि उनले भने, “राम्रो काम गर्यौं भने आशिर्वाद थपिदिनुस्, नराम्रो काम गर्यौं भने कमेन्ट गरिदिनुस् ।”
महसञ्चारले १७ वर्षपछि कथानक चलचित्र ‘शत्रुगते’ निर्माणको घोषणा गरेको छ । हरिवंश आचार्यको कथा रहने चलचित्रको पटकथा दीपकराज गिरी र प्रदीप भट्टराईले लेखेका छन् । संवाद हरिवंश आचार्य र प्रदिप भट्टराईको रहेको चलचित्र दीर्घ गुरुङले खिच्नेछन् । राजनराज सिवाकोटीको संगीत रहने चलचित्रको कोरियोग्राफी कविराज गहतराजले गर्नेछन् ।
चैत ९ गते प्रदर्शनमा आउने चलचित्र कात्तिक ६ गतेबाट छायांकन सुरु गरिनेछ ।
प्रदिप भट्टराईले निर्देशन गर्ने चलचित्रमा महजोडी सँगै दीपकराज गिरी, दिपाश्री निरौला, शिवहरि पौड्याल, राजाराम पौड्याल, प्रियंका कार्की, आँचल शर्मा, वसुन्धरा भुसाल, किरण केसी, नरेन्द्र कंसाकारलगायत कलाकारले अभिनय गर्नेछन् ।