मतदातालाई कसैको प्रभावमा नपरी उमेदवार छान्न सहज होस् भनेर निर्वाचनभन्दा केही समय पहिलेदेखि नै प्रचारप्रसार बन्द गर्ने अर्थात् मौन अवधि लागु गरिन्छ । तर, नेपालमा भने यही अवधिमा मतदातालाई बढी प्रभावित पार्ने गरी चलखेल हुने गर्छ । विशेषगरी पैसा बाँड्ने र भोज खुवाउनेहरू यस अवधिमा विशेष सक्रिय हुनेगर्छन् । प्रदेश नम्बर २ मा हुने स्थानीय तहको निर्वाचनको पनि मौन अवधि सुरु भइसकेको छ । यसैले त्यहाँ चुनाव प्रचारका सबै क्रियाकलाप बन्द हुनुपर्ने हो । तर, अगिल्ला दुई चरणमा भन्दा पनि प्रदेश नम्बर २ मा २०७४ साल असोज २ गते हुनलागेको स्थानीय तहको निर्वाचनमा मौन अवधिमा पनि चुनाव प्रचारको काम बढी नै भएको समाचार आएका छन् । 

स्थानीय तहको पहिलो र दोस्रो चरणको निर्वाचनमा व्यापक धाँधली भएको गुनासो खासै सुनिएको थिएन । यसैगरी केही बाहुबली र कारोबारीहरूले पार्टीको सदस्यका रूपमा उमेदवारी पाएको भनिए पनि उमेदवारी किनबेच भएको गुनासो उति सुनिएको थिएन । दुर्भाग्य, स्थानीय तहको तेस्रो चरणको निर्वाचनमा पहिलेका कमजोरी, त्रुटि र विकृति सच्याइनुपर्नेमा झन् बढाइएको देखिएको छ । राजनीतिक कार्यकर्तालाई उपेक्षा गरेर पैसा लगानी गरेकै भरमा सन्देहास्पद चरित्रका व्यापारी र बाहुबलीलाई उमेदवार बनाउन दलहरूबीच होड चलेको छ । अगिल्लो दिनसम्म एउटा पार्टीबाट उमेदवारी माग्ने व्यक्ति भोलिपल्ट अर्कै पार्टीका तर्फबाट उमेदवार बन्न पुगेका समेत उदाहरण देखिएको छ । उमेदवार हुनैका लागि राजनीतिक, आर्थिक र नैतिक मूल्य मिच्न नहिचकिचाउनेहरू निर्वाचित भए भने लगानी उठाउन जे पनि गर्न तम्सने निश्चितै छ । 

अहिले नै जनताले विवेक देखाउन सकेभने राजनीतिक नेतृत्वलाई सरापेर बस्नुपर्ने छैन । बरु, उनीहरूलाई कहिल्यै बिर्सन नसक्ने पाठ पढाउन सकिनेछ । राजनीतिक निष्ठामा रहेका व्यक्तिलाई जनताले छाने भने राजनीतिक कालोबजारीहरूको मनोबल खस्कनेछ । तर, पैसाको प्रभावमा राजनीतिक कारोबारीलाई जिताइयो भने त्यसको परिणाम भयावह हुनसक्छ । कारण, कालोबजारमा उमेदवारी किन्नेले निर्वाचनमा मत पनि पाए भने पार्टीका नेताहरूले पैसावाललाई उमेदवारी बेच्ने बहाना पाउने छन् । व्यापारीको संसद्मा सानो उपस्थितिले त कानुनहरू तिनैको स्वार्थपूरा हुनेगरी बनाउन बाध्य गरेको छ भने संसद्मा उमेदवारी किन्नेहरूको बहुमत भयो भने कस्तो अवस्था होला ? त्यसपछि यिनै कालाबजारीले पार्टी पनि कब्जा गर्नेछन् । स्थानीय सरकारहरू त यसै पनि तिनको नियन्त्रणमा पुग्नेछन् । अहिले प्रदेश नम्बर २ का मतदातासामु आफू विवेकशील भएको प्रमाणित गर्ने चुनौती उत्पन्न भएको छ । आशा गरौँ, जनकपुर, वीरगन्ज, राजविराजजस्ता क्षेत्र पर्ने प्रदेश नम्बर दुईका जनताले गौरवमय अतीत सम्झनामा राखेर लोकतन्त्रको पराजय हुन दिनेछैनन् । यसैगरी गर्वले शिर ठाडो पार्नसक्ने गरी असल राजनीतिक व्यक्तित्वलाई प्रतिनिधि छानेर उमेदवारी नै खरिद गर्ने कारोबारीलाई दुत्कार्नेछन् । अर्थात्, नेपालको राजनीतिलाई थप दूषित हुनबाट जोगाउने छन् ।