काठमाडौं । काठमाडौं उपत्यकामा सार्वजनिक यातायातमा महिला तथा बालबालिकामाथि हुने दुर्व्यवहार न्यूनिकरण गर्न प्रहरीले चालेको सेफ्टी पिन अभियानमा ७१ जना पक्राउ परेका छन् ।

महानगरीय प्रहरी कार्यालय रानीपोखरीले साउन १८गतेदेखि यो अभियान चालेको थियो ।

सार्वजनिक यातायातमा महिला तथा बालबालिकामाथि हुने यौनजन्य दुर्व्यवहारलाई न्यूनिकरण गरी उनीहरुको लागि सुरक्षित यात्रा गर्ने वातावरण बनाउन प्रहरीले ३३ वटा टोली बनाई उपत्यकाका विभिन्न सवारीसाधनमा खटाएको थियो ।

सादा पोशाकका प्रहरीले यस्तो दुर्व्यवहार गर्ने ७१ जनालाई अहिलेसम्म नियन्त्रणमा लिइसकेको प्रहरीले जानकारी दिएको छ । गालीगलौज गर्ने ४८, अश्लिल क्रियाकलाप गर्ने १०, अन्य ५ र पाकेट मार्ने ८ जनालाई नियन्त्रणमा लिइएको प्रहरीले जनाएको छ ।

प्रहरीकाअनुसार यौनजन्य यौनजन्य दुर्व्यवहार र गालीगलौज गर्ने बढी लेखपढ गरेकै व्यक्ति रहेका छन् । “यौनजन्य दुर्व्यवहार र गालीगलौज गर्ने ४८ मध्ये सबैभन्दा बढी साधारण लेखपढ जानेको ३८ जना छन् भने स्नातकोत्तर गरेका १ जना समेत रहेका छन्,” प्रहरीले भनेको छ, “यस्तो हिँसाजन्य क्रियाकलापमा १५ देखि २५ वर्ष उमेर समूहको बाहुल्यता देखिन्छ ।”

यो अभियान ३ महिनासम्म निरन्तर सञ्चालन हुने र त्यसपछि आवश्यकताअनुसार संचालन हुने प्रहरीले जनाएको छ । प्रहरीले पीडितको उजुरी गोप्य राखिने भएकाले यस्ता क्रियाकलाप भए प्रहरीको हटलाईन १०० र ९८५१२८९११ मा खबर गर्न अनुरोध गरेको छ ।