काठमाडौं । मलेसियामा जारी एसीसी यू–१९ एसिया कप छनोट अन्तर्गत सिंगापुरले दिएको ६८ रनको लक्ष्यसहित जवाफी ब्याटिङ गरिरहेको नेपालले तेस्रो विकेट गुमाएको छ । 

मलेसियाको क्लब अमान ओभलमा नेपालले तेस्रो विकेटको रुपमा ओपनर सन्दिप सुनारलाई गुमाएको हो ।  उनलाई  सिंगापुरका अनश भर्गावाले २० रनमा पेभेलियन फर्काए ।  सन्दिपलाई गुमाएपनि नेपाल जितको नजिक पुगेको छ । नेपालले ११ ओभरको खेल सकिदा ३ विकेट गुमाएर ५९ रन जोडेको छ ।

यसअघि टस जितेर पहिले ब्याटिङ गरेको सिंगापुर २८ ओभर ३ बलमा अलआउट हुँदै ६७ रनमा समेटिएको थियो ।  सिंगापुरका लागि सिधान्त र अर्यमान सुनीलले समान २० – २० रन तथा रोहण रङराजनले ११ रन बनाउनु बाहेक अन्य ब्याट्सम्यानले उलेख्य रन जोड्न सकेनन्  । 

सिंगापुरलाई सस्तैमा समेट्न नेपालका पवन सराफ एक्लैले ६ विकेट लिए । पवनले ८ ओभरमा ४ मदनसहित मात्र १२ रन खर्चिएका थिए ।