काठमाडौं । डीआईजी नवराज सिलवालले राजीनामा दिएका छन् । कासमूका आधारमा आफू नै प्रहरी महानिरीक्षक हुनुपर्ने माग गर्दै सर्वोच्चमा दायर गरेको रिट खारेज भएकै दिन उनले राजीनामा दिएका हुन् ।

उनले विज्ञप्ति जारी गर्दै आजैका मितिबाट नेपाल प्रहरीको सेवाबाट अलग भएको बताएका छन् । “म यो क्षणमा पनि फेरि यस्तो दुस्साहस कहिल्यै नहोस् मेरो नियति फेरि कसैले भोग्न नपरोस् र प्रहरी संगठनको स्वाभिमान पहाड जस्तो सुदृढ रहोस् भन्ने कामना गर्दछु,” विज्ञप्तिमा भनेका छन् ।

उनले विज्ञप्तिमा न्याय प्राप्तिका लागि गरिएको ७ महिना लामो कानुनी लडाइको अन्त भएको पनि बताएका छन् । “मेरो लडाइ स्थिर र निष्पक्ष प्रहरी प्रशासनको अवधारणको लागि थियो । असल शासन व्यवस्थाको लागि थियो । यो लडाई प्रहरी संगठन उपर हुने राजनैतिक हस्तक्षेप र स्वेच्छाचारीतालाई दुरुत्साहन गर्नको लागि थियो । अन्यायमाथि विजयका लागि थियो,” उनले जारी गरेको विज्ञप्तिमा उल्लेख छ ।

उनले विज्ञप्तिमा प्रहरीमाथि राजनीति गर्ने अथवा राजनीतिक आधारमा प्रहरी परिचालन गर्ने दृष्टिकोण रहेसम्म कानुनी राज्य स्थापित हुन नसक्ने पनि उल्लेख गरेका छन् ।
उनले कानुनलाई नै बायाँ हातको खेल बनाउनेहरुबाट प्रजातन्त्र सुरक्षित रहन नसक्ने बताएका छन् ।

तर उनलाई कासमु कीर्तेमा भने कारवाही प्रक्रिया अघि बढाइने भएको छ ।

अति गोप्य रहने डीआईजीको कार्यसम्पादन मुल्यांकन कीर्ते गरेर सर्वोच्च अदालतमा बुझाएको आरोप लागेका डीआईजी सिलवालमाथि प्रहरीले आन्तरिक रुपमा छानविन गर्ने भएको छ ।

उनले आफू आईजीपी हुनुपर्ने मागसहित सर्वोच्च अदालतमा दर्ता गरेको रिट मंगलबार मात्रै खारेज भएको छ । तर उनीविरुद्द कीर्तेको आरोप सम्बन्धी विषय टुंगो नलागेको भन्दै छानविन समितिले प्रक्रिया अघि बढाउने तयारी गरेको हो ।

अति गोप्य कागजात कीर्ते गरेर सर्वोच्चमा बुझाएको आरोप लागेपछि सरकारले एआईजी विजय कुमार भट्टको नेतृत्वमा छानविन समिति गठन गरेको थियो ।
सर्वोच्चले रिट खारेज गरिदिएपछि समितिलाई कारवाही अघि बढाउन बाटो खुला भएको छानविन समिति स्रोतले जानकारी दियो । तर सर्वोच्च अदालतले सोही बेला मुद्दाको किनारा नलागेसम्म अनुसन्धान नगर्नू भन्ने आदेश दिएपछि समितिले काम रोकेको थियो ।

समितिले प्रहरी प्रधान कार्यालयमा बयानका लागि बोलाएपछि डीआईजी सिलवाल बयान दिन नगई सर्वोच्च पुगेका थिए । प्रहरी प्रधान कार्यालय उच्च स्रोतकाअनुसार समितिले तयार पारेको प्रतिवेदनसहित कारवाही अघि बढाउन सिफारिस गर्ने तयारी भएको छ ।

सरकारले डीआईजी जय बहादुर चन्दलाई प्रहरी महानिरीक्षक बनाएपछि सिलवाल वरियताक्रममा आफू नै अघि भएको दाबी गर्दै सर्वोच्च पुगेका थिए ।

सर्वोच्चको आदेशपछि सरकारले अर्का डीआईजी प्रकाश अर्याललाई प्रहरी महानिरीक्षक बनाएपछि पनि सिलवालले सोही दाबी गर्दै अदालतमा बुझाएको कार्यसम्पादन मुल्यांकन कीर्ते गरेको आरोप छ ।

तीन आर्थिक वर्षको कार्यसम्पादन मुल्यांकन हेरेर बढी नम्बर ल्याएका अर्याललाई आईजीपी बनाएपछि सिलवाल दोस्रो पटक अदालत पुगेका थिए । 
उनीमाथि कीर्ते गरेको आरोप लागेपछि समितिले छानविनका लागि बोलाएको थियो ।  उनले अदालतमा त्यही विषयमा नै मुद्दा विचाराधीन रहेको भन्दै बयान दिन अस्वीकार गरेका थिए ।
तर पछि समितिले उनीसँग बयान लिइसकेको छ । विधि विज्ञान प्रयोगशालाबाट आएको रिपोर्टका आधारमा छानविन समितिले प्रतिवेदन तयार पारेको स्रोतको दाबी छ ।