विदेश

उत्तर कोरियाविरुद्ध राष्ट्र संघको अर्को प्रतिबन्ध

काठमाडौं । संयुक्त राष्ट्र संघ सुरक्षा परिषद्ले उत्तर कोरियामाथि नयाँ प्रतिबन्ध लगाएको छ । बीबीसीका अनुसार चीन र रुसले समेत सहमति जनाएकाले उक्त नयाँ प्रतिबन्ध सर्वसम्मतिबाट लगाइएको हो । 

उत्तर कोरियाले गत तीन सेप्टेम्बरमा छैटौं पटक सबैभन्दा ठूलो परमाणु परीक्षण गरेको थियो । पटकपटक विभिन्न पक्षले गरेको आग्रह र अनुरोधलाई बेवास्ता गर्दै उत्तर कोरियाले आफ्नो परमाणु कार्यक्रमलाई निरन्तरता दिनुका साथै अमेरिकामाथि आक्रमण गर्ने चेतावनीसमेत दिँदै आएको छ । उत्तर कोरियाले मिसाइलमा लोड गर्न सकिने गरी आफूले परमाणु बम विकसित गरेको दाबी गर्दै आएको छ ।

पछिल्ला दिनमा उत्तर कोरियाले मिसाइल परीक्षणलाई निकै तीव्रता दिइरहेको छ । उसले थुप्रै मिसाइलहरूको परीक्षण गर्नुका साथै त्यस्ता हतियारको समेत परीक्षण गरेको छ, जसको पहुँच अमेरिकासम्म छ । केही दिनअघि उत्तर कोरियाले जापानको आकाशमाथि एउटा मिसाइल प्रक्षेपण गरेको थियो । उक्त प्रक्षेपणलाई जापानका प्रधानमन्त्री शिञ्जो आबेले अभूतपूर्व खतरा बताएका थिए । उत्तर कोरियाले प्रशान्त महासागरअन्तर्गत पर्ने अमेरिकाअधीनस्थ गुआम टापुमा मिसाइल हमला गर्ने धम्की दिँदै आएको छ । उता गत अगस्तमा अमेरिकी राष्ट्रपति डोनाल्ड ट्रम्पले यस्तै हो भने अब उत्तर कोरियाका विनाशका दिन निम्तिएको टिप्पणी गरेका थिए ।  

उत्तर कोरियामाथि प्रतिबन्ध लगाउने सम्बन्धमा अमेरिकाले मस्यौदा तयार पारेको थियो र यसलाई रुससहित सुरक्षा परिषद्का सबै १५ सदस्यले स्वीकृति दिएका थिए । नयाँ प्रतिबन्धमार्फत उत्तर कोरियाको आयस्रोत बन्द गर्ने कोशिश गरिनेछ । उत्तर कोरियाबाट कपडाको निर्यात हुँदै आएकोमा प्रतिबन्धमार्फत त्यसमाथि रोक लगाइएको छ ।

यस्तै अबदेखि उत्तर कोरियाले निर्धारित सीमासम्म मात्र कच्चा तेलको आयात गर्न सक्नेछ । 

यसअघि सन् २००६ देखि संयुक्त राष्ट्र संघको सुरक्षा परिषद्ले उत्तर कोरियाविरुद्ध नौवटा प्रतिबन्धात्मक प्रस्तावलाई एक मतले स्वीकृति दिएको थियो । 
 

तपाईंको मत