काठमाडौं । अमेरिकी राष्ट्रपति डोनाल्ड ट्रम्पले मेक्सिकोसँगको सीमामा पर्खाल बनाउन गरेको घोषणा पूरा गर्नको लागि चार कम्पनीलाई पर्खालको नमुना बनाउन छानेको छ ।

यी चार कम्पनीले बनाउने पर्खालको नमुनाको उचाइ ३० फिट हुनुका साथै लम्बाइ पनि ३० फिट नै हुने र केही महिनामै नमुना तयार हुने अमेरिकी कष्टम एण्ड बोर्डर प्रोटेक्सनले जनाएको छ ।

पर्खालको नमुना तयार भएपछि अमेरिकी अधिकारीहरुले करिब २ महिनासम्म ती नमुना पर्खालको मजबुतीको परीक्षण गर्नेछन् । यसका लागि ती चार कम्पनीलाई पाँच लाख डलरका दरले भुक्तानी दिइने बीबीसीले जनाएको छ ।

अमेरिकी सीमा गस्तीका प्रमुख तथा डेपुटी कमिष्नर रोनाल्डो भिटीएलोले प्रेस सम्मेलनमा ती कम्पनी अलाबामा, एरिजोना, टेक्सस र मिसिसिपिका भएको जानकारी दिएका छन् ।
नमूना पर्खाल स्यानडियागो क्यालिफोर्नियामा बनाइने छ ।