काठमाडौं । यती एयरलाइन्सले शुक्रबारदेखि आफ्नो सर्वाधिक नयाँ ‘योंगेस्ट एटीआर ७२–५०० एयरक्राफ्ट’को परिक्षण उडान सफलतापूर्वक सम्पन्न गरेको छ । काठमाडौं आन्तरिक विमानस्थलबाट करिव दिउँसो १२ः१५ बजे ४१ सदस्य सहित छुटेको विमानले भैरहवा विमानस्थलमा करिव ३ः५० मा सफलतापूर्वक अवतरण गरेको जनाइएको छ ।
विमानको सञ्चालन क्याप्टेन ग्याब्रियल सी कुण्डा र क्याप्टेन रुप कुमार सिद्धिले गरेका थिए । 
सफल परिक्षण उडानको रिपोर्ट ‘सीएएएन’लाई हस्तान्तरण गरिसकिएको कम्पनीले जानकारी दिएको छ । सीएएएनबाट क्लियरेन्स प्राप्त भएसँगै तालिकासंगत उडानले निरन्तर्ता पाउने कम्पनीको भनाइ छ । 
कम्पनीका अनुसार यती एयरलाइन्सले उक्त विमानको सञ्चालन पहिलो चरणमा नेपालगञ्ज र बिराटनगरमार्फत गर्नेछ । 
दोस्रो विमान प्राप्त भएँगै यती एयरलाइन्सले भद्रपुर र भैरहवामा समेत आफ्नो सेवा सुचारु गर्ने योजना बनाएको छ । यती एयरलाइन्सले आफ्नो दोस्रो विमानको स्वामित्व यही सेप्टेम्बर महिनामै प्राप्त हुने जानकारी दिएको छ । 
६५ सदस्य सहित उडान भरेको परिक्षण उडानको सफलतापूर्वक सम्पन्न भएसँगैै निकट समयमा नै भैरहवामा दैनिक उडान सेवा उपलब्ध गराउने कम्पनीको भनाइ छ । 
यात्रुलाई उत्कृष्ट सेवा र आरामदायी अनुभव प्रदान गर्ने उद्देश्य रहेको बताउदै कम्पनीले नेपालकै सर्वाधिक नयाँ एटीआर विमानमार्फत यती एयरलाइन्ससंँको यात्रामा यात्रुलाई सर्वोत्कृष्ट अनुभव प्रदान गर्ने आफ्नो प्रतिबद्धतालाई निरन्तरता दिने जनाएको छ ।
सन् १९९८ मा स्थापित यती एयरलाइन्सले सेवाप्रदान गर्न थालेको अहिले १८ बर्ष पुगेको छ ।