काठमाडौं । साउदी अरेबियाले कतारबाट आउने हज यात्रीको लागि आफ्नो सीमा खोल्ने भएको छ ।
कतारबाट आउने हज यात्रीलाई प्रवेश दिनको लागि साउदीले सालवा वोर्डर पोइन्ट कुनै विद्युतीय स्वीकृति बिना खोल्ने भएको साउदीको सरकारी समाचारसंस्था साउदी प्रेस एजेन्सीले जनाएको हो ।
साउदी प्रेस एजेन्सीले साउदी राजा सलमान विन अब्दुलाजिज अल साउदले कतारी हजयात्रीलाई हजको लागि निमन्त्रणा दिएको र उनीहरुको खर्च पनि साउदीले बेहोर्ने बताएका छन् । यसका साथै सबै कतारी नागरिकलाई किङ फहाद र इस्सा विमानस्थलबाट मक्का जाने सुविधा पनि दिने घोषणा गरिएको छ ।
यसका साथै राजा सलमानले साउदी एअरलाइन्सका सबै प्राइभेट जहाजलाई दोहा पठाउन निर्देशन दिनुका साथै यसको सबै खर्च आफुले बेहोर्ने बताएका छन् । जेद्दाहमा रहेको एअरपोर्ट नै हज यात्राको लागि मक्का र मदिना जाने हजयात्रीको प्रमुख केन्द्र मानिन्छ ।
साउदी अरेयिबा, इजिप्ट, बहरान र संयुक्त अरब इमिरेट्सले जुन ५ मा कतारसँगको सम्बन्ध अन्त्यको घोषणा गरेपछि सालवा बोर्डर क्रसिङ् बन्द भएको थियो । साउदीको अहिलेको निर्णय उपर कतार सरकारले केही प्रतिक्रिया दिएको छैन ।