काठमाडौं । विसं. २०७० पछि रोकिएको ए डिभिजन लिग फुटबल मंसिर १४ गतेदेखि सुरु हुने भएको छ । अखिल नेपाल फुटबल संघ (एन्फा) को बुधबार (आज) बसेको कार्यसमितिको बैठकले मंसिरमा ए डिभिजन लिग गर्ने निर्णय गरेको हो ।
एन्फाको कार्यसमितिको बैठकले एएफसी एसियन क्लब च्याम्पियनसिपको प्लेअफ खेल्नबाट बन्चित भएको थ्रीस्टारलाई क्षेतिपूर्ति दिने सम्बन्धमा भने बरिष्ठ उपाध्यक्ष मणि कुवंरको संयोजकत्वमा ३ सदस्यीय कमिटी गठन गरेको छ । कमिटीले १० दिनभित्र अध्ययन गरी प्रतिबेदन बुझाउनु पर्ने कार्यसमितिको बैठकले निर्णयले गरेको छ ।
एन्फाले विधान संशोधनका लागि असोज २३ गते विशेष साधारण सभा गर्ने भएको छ । एन्फाको चुनाव भने पौष २३ गते हुने निर्णय भएको छ ।
बुधबार बसेको बैठकले एएफसी यू–१६ च्याम्पियनसिप २०१८ को छनोटको लागि करिब ८५ लाख ५१ हजार ६०० रुपैयाँ बजेट लाग्ने र एएफसी एसियन कप २०१९ छनोट चरणअन्तर्गत नेपालले आयोजना गर्ने खेलको लागि लाग्ने बजेट पनि पास गरेको छ । साथै कार्यसमितिको बैठकले साफ र एएफसी यु–१८ च्याम्पिपयनसिपको लागि २६ लाख ८९ हजार रुपैयाँ लाग्ने र एन्फा फुटसल लिग र एएफसी फुटसल च्याम्पियनसिपमा सहभागि हुदाँ लाग्ने सम्पूर्ण खर्च एन्फाले ब्यहोर्ने पनि निर्णय गरेको छ ।