काठमाडौं । बाढी पहिरोबाट कृषि क्षेत्रमा साढे तीन अर्बभन्दा बढीको क्षति पुगेको कृषि विकास मन्त्रालयले बताएको छ । मन्त्रालयले मुलुकका ५ वटै विकास क्षेत्रमा हालैको बाढीले अन्नबाली, तरकारी बाली तथा माछा खेतिमा गरी ३ अर्ब ६४ करोड ३४ लाख मूल्य बराबरको क्षति पुगेको प्रारम्भिक जानकारी गराएको हो । 

सबैभन्दा बढी मध्यमाञ्चलका १० जिल्लामा बाढीले २ अर्ब ६५ करोड १४ लाखको अन्नबाली, तरकारी, माछा पालन लगायतमा क्षति पुगेको छ । त्यसैगरी पूर्वाञ्चलमा ६५ करोड ५० लाख, सुदूरपश्चिमाञ्चलमा १० करोड ८३ लाख, मध्यपश्चिमाञ्चलमा २१ करोड ४९ लाख तथा पश्चिमाञ्चलमाा ५७ लाख बराबरको क्षति पुगेको छ । 

मन्त्रालयका अनुसार १ लाख ९८ हजार ६ सय ९८ हेक्टरको धानखेती, २९ हजार १ सय ३७ हेक्टरमा लगाएको तरकारी  खेती, ३ हजार ५ सय ६१ हेक्टरमा गरिएको माछा पालन,८ हजार ३ सय ५२ हेक्टरमा लगाएको मकै बाली तथा १ हजार १ सय ११ हेक्टर क्षेत्रफलको दलहन, केरा ५३ हेक्टर, बदाम १५ हेक्टर , तेलहन १५ हेक्टर, माछाका भुरा १५ हेक्टर, तथा  १.३४ हेक्टर क्षेत्रफलमा लगाएको कोदो बालीमा क्षति पुगेको अनुमान छ । 

त्यसैगरी १२ करोड रुपैयाँको सञ्चित खाद्यान्नमा क्षति पुगेको छ । यसैबीच कृषि विकास र पशुपन्छी विकास मन्त्रालयलले एक साताभित्र कृषिमा पुगेको क्षतिका लागि कृषकलाई राहत प्याकेजको व्यवस्था गर्ने बताएका छन् । 

मन्त्रालयले मध्यमाञ्चलका बारा, पर्सा, रौतहट, सर्लाही, धनुषा, महोत्तरी, चितवन, रसुवा, रामेछाप र ललितपुर, पूर्वाञ्चलका झापा, मोरङ, सुनसरी, सप्तरी, सिरहा तथा सुदूरपश्चिमाञ्चलका बझाङ, दार्चुला, बैतडी, कैलाली, डोटी, मध्यमाञ्चलका दाङ, बाँके, बर्दिया तथा पश्चिमाञ्चलका म्याग्दी, रुपन्देही, कास्की, बाग्लुङ, गुल्मी र नवलपरासीमा बाढीले अन्न बाली, तरकारी बाली, तेलहन तथा माछापालनमा पुर्याएको क्षतिको प्रारम्भिक अनुमान सार्वजनिक गरेको हो ।