काठमाडौं । उत्तर कोरियाली नेता किम जोन उनले अमेरिकी भू–भाग गुआममा आक्रमण गर्ने योजना उपर पुर्नविचार गर्दै अहिलेको लागि उक्त योजना थाति राख्ने भएका छन् ।
उत्तर कोरियाले अमेरिकाको व्यवहार हेर्ने र सोही अनुरुप कदम चाल्ने गरि पुर्नविचार गरेको त्यहांको सरकारी समाचारसंस्थाले जनाएको हो । तर थाति राखिएको सैन्य कारबाहीको योजना जुनसुकै समयमा प्रयोग हुन सक्ने भनि चेतावनी समेत दिएको छ ।
के भनिएको छ उत्तर कोरियाको सरकारी समाचारसंस्थाको रिपोर्टमा ?
उत्तर कोरियाको सरकारी समाचारसंस्था केसिएनएले किम जोन उनले आक्रमण योजना उपर लामो समयदेखि सोचविचार गरिरहेको र यस विषयमा उच्च सैन्य अधिकारीहरुसँग पनि छलफल गरेको जनाएको छ ।
केसिएनएको उक्त रिपोर्टमा उत्तर कोरियाले कुनै कदम चाल्नुअघि अमेरिकाको चाल पर्खिने उल्लेख गरेको छ जसका कारण उत्तर कोरिया गुआम आक्रमणको योजनाबाट पछि हटेको विश्लेषण गर्न थालिएको छ ।
उत्तर कोरियाको अहिलेको प्रतिक्रियाले अमेरिकासँगको वाक्युद्ध पनि केही हदसम्म सेलाउने अनुमान पनि गरिएको छ । यसअघि अगष्टको दोश्रो साता उत्तर कोरियाले अमेरिकी भू–भाग गुआममा आक्रमण गर्ने चेतावनी दिएपछि दुई देशका प्रमुखबीच वाक्युद्ध सुरु भएको थियो जसले आणविक युद्ध निम्त्याउने अनुमान गरिएको थियो ।
तर केही विश्लेषक भने उत्तर कोरियाको अहिलेको निर्णयलाई झेलको रुपमा पनि हेरिरहेका छन्, अर्थाइ रहेका छन् । जसरी उत्तर कोरिया अन्य देशको पहुँच बाहिर छ यहाँ भित्र भइरहेको तयारी वा लिन सक्ने सम्भावित निर्णयबारे पनि उत्तिकै बेखबर छ अन्तर्राष्ट्रिय समुदाय । अझ उत्तरले सैन्य कारबाही टेबलमै रहने भनेपछि यसले उत्तर कोरिया उपरको विश्वास उपर नै प्रश्न उठाएको छ ।
अर्को अर्थमा लिने हो भने पनि उत्तर कोरियाले गुआममा आक्रमण गर्नको लागि त्यति सामथ्र्य आफुसँग नरहेको महसुस गरेर नै अहिलेको लागि स्थगनको बटन थिचेको पनि हुन सक्छ । आफुलाई सबल बनाउनको लागि उत्तर कोरियाले थप समय लिनको लागि यस्तो निर्णय लिएको हो भने यसले झन् खतरा निम्त्याउँदैछ ।
उत्तर कोरियाका छिमेकीहरु के भनिरहेका छन् ?
दक्षिण कोरिया र उत्तरको सबैभन्दा नजिक मानिएको चीनले पनि अहिलेको अवस्था साम्य पार्नको लागि कुटनैतिक संवाद आवश्यक रहेको भन्दै संवादलाई जोड दिइरहेका छन् ।
मंगलवार मात्रै पनि दक्षिण कोरियाली राष्ट्रपति मुन जेइ–इनले अमेरिकाले कोरियाली प्रायद्धिपमा कुनै प्रकारको कदम चाल्नुअघि आफुसँग पनि सुझाव लिनुपर्ने बताएका छन् ।
उनको अमेरिकाले कोरियाली प्रायद्धिपमा सैन्य कारबाहीको अप्सन छानेमा एक्लो निर्णय लिन नहुने प्रस्ट पारेका छन् । दक्षिण कोरिया र अमेरिकाले यसअघि नै गरेको रक्षा सम्झौता अनुसार दुई राष्ट्रले आन्तरिक वा वाह्य आक्रमणको खतरा बढेमा संवाद गरि दुबैको सहमतिमा मात्रै सैन्य कदम चाल्नुपर्ने उल्लेख छ ।
के छ अमेरिकाको अहिलेको जवाफ ?
अमेरिकी रक्षामन्त्री जेम्स म्याटिसले यसअघि नै पनि दुई देशबीचको वाक् युद्धले सैन्य युद्ध निम्त्याउन सक्ने र उत्तरले गुआममा आक्रमण गरेको खण्डमा सुरु भइहाल्ने चेतावनी दिएका थिए ।
उनले अमेरिकी सेनाले आफ्नो देश बचाउनको लागि कुनै पनि समय र ठाउँमा तयार रहेको बताएका छन् । यसका साथै उनले गुआममा आक्रमण भएको खण्डमा बचाउनलाई अमेरिकाले कुनै कसुर बाँकी नछाड्ने बताएका छन् ।
–एजेन्सीको सहयोगमा