काठमाडौं । हास्य कलाकार सीताराम कट्टेल धुर्मुस र कुञ्जना घिमिरे सुन्तलीले धुर्मुस सुन्तली फाउन्डेशनका नाममा सर्वसाधारणले विदेशबाट पठाउने रकम हिनामिना गरेको भन्ने उजुरी परेको र उक्त तथ्य गलत भएको भन्दै दुःख व्यक्त गरेका छन् । केही दिनअघि काभ्रे, धुलिखेलका राज हुमागाईंले नेपाल सरकार मन्त्रिपरिषदको कार्यालय र समाज कल्याण परिषदको कार्यालयलमा उजुरी दिएको र छानविन गर्दा आरोप प्रमाणित हुन नसकेको भन्दै धुर्मुस सुन्तलीले दुःख व्यक्त गरेका हुन् ।

फाउन्डेशनले आइतबार एक विज्ञप्ति प्रकाशित गरी, देश र जनताको पक्षमा काम गर्दागर्दा र सरकारलाई सघाउँदासघाउँदै पनि बदनाम गर्न खोजिएको बताएको हो ।

हुमागाईंले उजुरी दिएपछि समाज कल्याण परिषद्ले आवश्यक छानविन गरेको र आरोप प्रमाणित नभएको व्यहोरा पत्राचार गरेको फाउन्डेशनको भनाइ छ । 

धुर्मुस सुन्तलीले परियोजनाबाट व्यक्तिगत फाइदा लिन खोज्दा नपाएका व्यक्ति तथा समूहहरूले विभिन्न आरोप प्रत्यारोप लगाएको हुन सक्ने फाउन्डेशनले आशंका गरेको छ । 

फाउन्डेसनले त्यस्ता निराधार कुरा गर्ने व्यक्ति, समूहलाई आवश्यक कानुनी कारवाही गर्नसमेत माग गरेको छ । “यस्ता भ्रामक र बदनाम गराउने कुराबाट हामी विचलित छैनौँ । हिमाल, पहाड तराई जोड्ने, एकता, राष्ट्रियताको भावना जागृत गराउने काममा हामी दत्तचित्त छौँ,” सीताराम कट्टेल धुर्मुसले बताएका छन् ।