काठमाडौं । चीनले भारतीय सीमा नजिकैको तिब्बती भूभागमा योभन्दा धेरै सेना तैनाथ गर्ने र आफ्नो सम्प्रभुताको रक्षाका लागि हरसम्भव उपाय अपनाउने बताएको छ । 

चिनियाँ रक्षा मन्त्रालयका प्रवक्ताले सोमबार आयोजित एउटा पत्रकार सम्मेलनमा भने, ‘‘दुवै पक्षले स्वीकार गरेको सीमामा भारतले चौकी नाघेर अघि बढ्नु चिनियाँ भूभागको अतिक्रमण त हो नै, अन्तर्राष्ट्रिय नियमको समेत उल्लंघन हो ।...भारत भ्रममा नपरोस् कि उसको स्थिति प्रबल छ । पिपुल्स लिबरेसन आर्मीको ९० वर्षको इतिहासले के कुरा सिद्ध गरेको छ भने चीनको संप्रभुता र आफ्नो सीमाको रक्षा गर्न यो प्रतिबद्ध छ ।’’

प्रवक्ताले चिनियाँ सैनिक अत्यन्त दृढ रहेको दाबी गर्दै यसलाई डग्मगाउन हाल्नु भनेको पहाड हल्लाउनुजस्तै कठिन रहेको पत्रकार सम्मेलनमा बताए । यद्यपि प्रवक्ताले विवादित क्षेत्रमा चिनियाँ सेनाको तैनाथी र प्रशिक्षणका बारेमा अधिक जानकारी दिएनन् । 

भारत र चीनबीच सिक्किम नजिकैको दोक्लाममा चिनियाँ सेनाले सडक निर्माण गर्न सुरु गरेपछि विवाद उत्पन्न भएको छ । दोक्लाम चीन, भारत र भूटानको त्रिदेशीय सीमाक्षेत्र हो । चीनले यहाँ सडक निर्माण गर्यो भने कालान्तरमा आफ्नो प्रभावक्षेत्रबाट भूटान टाढिने र चीनको सामरिक क्षमता सुदृढ हुने भारतको आशंका छ ।