काठमाडौं । शुक्रवार बिहान ग्रीसको कोस टापु रहेको आजियन समुद्रलाई केन्द्रविन्दु बनाइ गएको ६ दशमलव ७ रेक्टर स्केलको भूकम्पमा २ जनाको मृत्यु भएको छ ।
टर्कीको समुद्री क्षेत्र नजिकै केन्द्रविन्दू रहेको भूकम्प समुद्री तहभन्दा १० किलोमिटर गहिराइमा रहेको अमेरिकी भूगर्भ मापन केन्द्रले जनाएको छ ।
भूकम्पको समयमा भागदौड र अन्य घटनामा परि कोस टापुमा २० जना घाइते भएको र टर्कीको बोडरम शहरमा केही मानिस घाइते भएको बीबीसीले जनाएको छ ।
शुक्रवारबिहान १ बजेर ३१ मिनेट जादां भूकम्प गएको थियो । भूकम्प पछि ती क्षेत्रमा सुनामी पनि आएको र समुद्रमा रहेको डुंगा सडकसम्म आइपुगेको ग्रीक प्रहरीले जनाएको छ ।
सामाजिक सञ्जालमा सेयर गरिएका तस्वीरमा टर्कीको बोडरम शहरमा पानी जमेर कुर्कुचासम्म आएको देखिन्छ । भूकम्पको समयमा भएको भागदौडको समयमा घाइते भएका करिब ७० जना मानिस उपचारको लागि अस्पताल आएको जनाइएको छ ।
पृथ्वीको फल्ट लाइनमा पर्ने ग्रीस र टर्कीमा समय–समयमा भूकम्प जाने गरेका छन् । यसअघि टर्कीमा सन् १९९९ मा गएको महाभूकम्पमा परि करिब १७ हजार मानिसको मृत्यु भएको थियो ।