काठमाडौं । सन् १९६९ मा एपोलो मिसनबाट चन्द्रमामा पाइला टेकेका अमेरिकी अन्तरिक्ष यात्री निल आर्मस्ट्रङ्ले चन्द्रमाबाट नमुना ल्याउनको लागि प्रयोग गरेको झेला १८ लाख अमेरिकी डलरमा लिलामी भएको छ ।
अमेरिकी शहर न्यू योर्कमा परिचय लुकाइएका एक व्यक्तिले सोथेबाइ लिलामी कम्पनीबाट उक्त झोला लिलाम गरेका हुन् । पहिलो पटक चन्द्रमाको सतहमा रहेका वस्तुको नमुना ल्याइएको उक्त झोलामा अझै पनि माटो र स–साना ढुंगाका अंश रहेको बीबीसीले जनाएको छ ।
एपोलो विमान पृथ्वीमा फर्किएपछि त्यसका सबै पार्टपुर्जा र वस्तुहरु स्मिथसोनियन म्युजियममा पठाइएको थियो । तर उक्त झोला जोनसन स्पेस सेन्टरमा नै छुटेको थियो ।
सन् २०१५ मा एक सरकारी लिलामी उक्त झोला इलिनियोसका एक वकिललाई ९ सय ९५ अमेरिकी डलरमा विक्रि गरिएको थियो ।
अमेरिकी अन्तरिक्ष अनुसन्धान केन्द्र नासाले उक्त झोला फिर्ता लिनको लागि मुद्धा लडेको थियो तर अदालतले पनि उक्त झोला ती व्यक्तिको भएको भन्दै ती व्यक्ति कै पक्षमा फैसला गरेको थियो । अहिले भने ती व्यक्तिले सोथेबाइमा विक्रिको लागि राखेका थिए ।
