काठमाडौं । आइसीसी यू–१९ विश्वकप क्रिकेट छनोट अन्तर्गत एसिया क्षेत्रको छनोटको चौथो खेलमा नेपालले घरेलु टोली सिंगापुरसँग प्रतिस्पर्धा गर्दैछ ।  
बालेस्टीर रोडस्थित इन्डियन एसोसियसन ग्राउण्डमा जारी खेलमा नेपालले टस जितेर पहिले ब्याटिङ गरिरहेको छ । सिंगापुरविरुद्ध पहिले ब्याटिङ थालेको  नेपालले मध्यम प्रदर्शन गरिरहेको छ । खेलको ३९ ओभरको समाप्तिमा नेपालले ७ विकेट गुमाएर १४४ रन बनाएर खेलिरहेको छ । नेपालले सातौं विकेटका रुपमा केहि बेरअघि दिपेन्द्रसिंह ऐरीलाई ५४ रनमा गुमाएको छ ।
नेपाल आज सिंगापुरलाई पराजित गर्दै न्युजिल्यान्डमा हुने आईसीसी यू–१९ विश्वकपमा छनोट हुने सम्भावना कायम राख्न चाहन्छ । उमेर समूहमा नेपाल अहिलेसम्म सिंगापुरसँग पराजित भएको छ । सिंगापुरबिरुद्ध पछिल्लो ५ भेटमा नेपालले सबै खेल जितेको छ । जारी छनोटको पहिलो खेलमा पनि नेपालले सिंगापुरलाई ४ विकेट पराजित गरेको थियो ।
तर, बिहिबार टेष्ट राष्ट्र अफगानिस्तानसँग १४१ रनको पराजयले नेपालको विश्वकप छनोट सम्भावनालाई ठुलो धक्का भने लागेको  छ । अब नेपाललाई विश्वकपको यात्रा तय गर्न सिंगापुरविरुद्ध र बाकीँ दुईखेल नै जित्नुपर्ने हुन्छ । त्यसबाहेक अन्य टोलीको खेलको नतिजाले समेत भर पर्नु पर्ने हुन्छ । छनोटमा नेपाल तीन खेलबाट ४ अंकसहित दोस्रो स्थानमा छ । अफगानिस्तान तीन खेलमा ६ अंक जोडेर लिगको शिर्ष स्थानमा छ ।
डबल राउण्ड रोबिनका आधारमा ४ राष्ट्र सम्मलित एसिया क्षेत्रको छनोटबाट एक टोलिले विश्वकप यात्रा तय गर्ने छ । छनोटको शिर्ष टोली अर्को वर्ष न्युजिल्यान्डमा हुने आईसीसी यू–१९ विश्वकपका लागि छनोट हुनेछन् । नेपालले अहिलेसम्म ७ पटक यु – १९ को विश्वकप खेलिसकेको छ । नेपालले गत वर्ष बंगलादेशमा भएको विश्वकप खेलेको थियो ।