काठमाडौं । भारत आईसीसी महिला एकदिवसीय विश्वकप क्रिकेटको फाइनलमा प्रवेश गरेको छ । बिहिबार  राति भएको दोस्रो सेमिफाइनलमा साबिकको विजेता अष्ट्रेलियालाई ३६ रनले पराजित गर्दै भारत उपाधि नजिक पुगेको हो ।
भारतले अब उपाधिका लागि घरेलु टोली इंग्ल्यान्डको सामना गर्ने छ । इंग्ल्यान्ड दक्षिण अफ्रिकालाई पराजित गर्दै यसअघि नै फाइनलमा पुगिसकेको छ । फाइनल खेल आइतबार लर्ड्समा हुने छ । भारत समूह चरणमा तेस्रो र अष्ट्रेलिया दोस्रो हुँदै सेमिफाइनलमा पुगेका थिए ।
डर्बीमा भारतले दिएको २८२ रनको लक्ष्य पछ्याएको अष्ट्रेलिया ४० ओभर १ बलमा अलआउट हुँदै २४५ रनमा समेटियो । खराब सुरुवात गरेको अष्ट्रेलियाले मात्र ३१ रन जोड्दा महत्वपूर्ण ३ विकेट गुमाइसकेको थियो ।  तर, अष्ट्रेलियाको पारी एलेक्स ब्लाकवेल र एलिस भिलानीले उकासेका थिए   । ब्लाकवेलले ९० तथा भिलानीले ७५ रनको अर्धशतकीय पारी खेलिन्  ।  यस्तै अष्ट्रेलियाकी एलास पेरीले ३८ रन बनाईन् । अष्ट्रेलियाको पारी ध्वस्त बनाउने क्रममा भारतकी दिप्ती शर्माले ३ तथा झुलन घोस्वानी र शिखा पाण्डेले समान २ – २ विकेट लिईन् ।
यसअघि ४२ ओभरमा झारिएको खेलमा टस जितेर पहिले ब्याटिङ गरेको भारतले पुरै ओभर खेल्दै ४  विकेटको क्षतिमा २८१ रनको उच्च योगफल तयार गरेको थियो । भारतको जितमा हर्मनप्रित कौरले शतकीय पारी खेलिन् । ११५ बलमा २० चौका र ७ छक्का प्रहार गरेकी उनले अविजित १७१ रन जोडिन् । यस्तै भारतकी कप्तान मिथाली राजले ३६ तथा दिप्ती शर्माले २५ रन जोडिन्  ।