ad

राजनीति

भरतपुरकाण्ड हेर्दा हेर्दैमा, अर्को सुनुवार्इ ८ गते हुने

काठमाडौं । भरतपुर महानगरपालिका १९को मतपत्र च्यातिएको सम्बन्धमा सर्वोच्च अदालतमा भएको बहस आज पनि हेर्दा हेर्दैमा राखिएको छ । सर्वोच्च अदालतका न्यायाधिश पुरूषोत्तम भण्डारी र ओम प्रकाश मिश्रको इजलासमा भएको बहसपछि हेर्दाहेर्दैमा राखिएको हो ।
साउन ८ गते अर्को सुनुवाइ हुनेछ ।
उता मतपत्र च्यातिएपछि अन्योलमा रहेको चितवनको भरतपुर महानगरपालिकाका प्रमुख पदका उमेदवारहरु पर्ख र हेरको अबस्थामा पुगेका छन् । 

भरतपुर वडा नम्बर १९ मा एक चरणको चुनावी अभियान सक्दा समेत सर्वाेच्चबाट कुनै निर्णय नआएपछि अहिले उमेदवारहरु अदालतको निर्णय कुर्न बाध्य भएका हुन् ।

चुनावी अभियान कै क्रममा निर्णय आउने छ भनेर सक्रिय भएका उनीहरु मतपत्र च्यातिएको ५० दिन वित्दा समेत कुनै निचोड आएको छैन । 

निर्वाचन सम्पन्न भएको आज ६४ दिन पुग्दा पनि उमेदवार अन्योलमा छन् । अन्य वडामा विजयी भएका जनप्रतिनिधिहरु समेत बेकामे भएका छन् । दोस्रो चरणको निर्वाचनबाट आएका जनप्रतिनिधिहरुले नगर र गाउँसभा गरेर बजेट बनाई विकासका योजना ल्याईसके । भरतपुर १९ भने बन्धक जस्तै भएको छ । 

मुख्यगरी सर्वाोच्च अदालतले समयमै फैसला नगर्दा समस्या आएको हो । भरतपुर महानगरको काँग्रेस र माओवादी केन्द्रबाट संयुक्त उम्मेदवार रेणु दाहाल अदालतको निर्णय ढिलाहुँदै सबै कामहरु रोकिएको महसुस भएको बताउँछिन् ।  “जे हुनु छ, छिटो भैदिए हुन्थ्यो,” दाहालले भनिन्, “समय लम्याउनुको अर्थ छैन ।”

उनले विगतको नजिर अनुसार पुनः मतदान कै निर्णय आउने बताईन् ।

गएको जेठ १४ गते पौने १२ बजे राति भरतपुर १९ को मतगणना कै क्रममा मतपत्र च्यातिएको थियो । पछि अनुगमन गर्दा ९० मतपत्र च्यातिएको पाईएको थियो । 
गणनाको अन्तिम अबस्थामा पुगेका बेला मतपत्र च्यातिएपछि निर्वाचन आयोगले भरतपुर वडा नम्बर १९ मा पुनः मतदानको निर्णय गरेको थियो । 

आयोगको निर्णय विरुद्ध एमालेले पुनःमतगणनाको माग गर्दै सर्वोच्चमा मुद्दा हालेको छ । एमाले भरतपुर १९ का सदस्यका उमेदवार गुञ्जमान विक र अधिवक्ता तुलसीराम पाण्डेले मुद्दा दर्ता गरेपछि सर्वोच्च अदालतले मतदान अघि नबढाउन आदेश दिएको उक्त मुद्दा विचाराधिन छ । 

पटक पटक  सुनुवाई सरेको मुद्दाको पेशी आजका लागि तोकिएको थियो । यसअघि जेठ २८, ३०, असार ६, २३ का पेशी त्यसै गुज्रिए । असार ६ गतेको आदेशअनुसार निर्वाचन सम्बन्धी र मतपत्र च्यातिएको विषयका सक्कल झिकाउन आदेश भएको थियो  ।

तपाईंको मत