काठमाडौं । आन्तरिक राजस्व विभागका निलम्बित महानिर्देशक चूडामणि शर्मालाई हिरासतमुक्त गरिपाऊँ भन्दै सर्वोच्च अदालतमा परेको मुद्दाको सुनुवाइ फेरि सरेको छ । उक्त मुद्दाको पेशी सोमबार (आज) तोकिएकोमा बहस नसकिएकाले भोलि (मंगलबार)का लागि हेर्दाहेर्दैमा राखिएको छ । सोमबार अधिवक्ताहरु टीकाराम भट्टराई, किरण पौडेल र सञ्जिव रेग्मीले शर्माको पक्षमा बहस गरेका थिए । न्यायाधीशहरु प्रकाशमान सिंह राउत र चोलेन्द्रशमशेर जबराको इजलाशमा उक्त मुद्दा राखिएको थियो ।
यसअघि न्यायाधीश पुरुषोत्तम भण्डारीको एकल इजलाशले विपक्षीको नाममा शर्मालाई थुनामा राख्नुको कारण तथा शर्मालाई समेत आगामी शुक्रबार अदालतमा उपस्थित गराउन आदेश जारी गरेपछि शर्मा सर्वोच्चमा उपस्थित भएका थिए ।
गैरकानुनी रुपमा थुनामा राखेको भन्दै शर्माकी श्रीमती कल्पना उप्रेतीले मंगलबार थुनामुक्त गर्न माग गर्दै सर्वोच्चमा रिट दायर गरेकी थिइन् । रिटमा शर्मासँग अमानवीय ढंगबाट धरौटी रकम माग गरिएको भन्दै अख्तियारलाई कर फरछ्र्योट आयोगले गरेको कामकारबाहीप्रति अनुसंधान गर्ने अधिकार नभएको उल्लेख छ ।
रिटमा अख्तियार दुरुपयोग अनुसन्धान आयोग, विशेष अदालत र अनुसन्धान अधिकृत राजन अधिकारीलाई विपक्षी बनाइएको छ ।
तस्बिर : रासस
