काठमाडौं । नेपाली समुदाय यूएईले विगतका वर्षमा झैं यस वर्ष पनि भानुजयन्ती विशेष कार्यक्रम सम्पन्न गरेको छ । नेपाली समुदाय (साहित्य कला संसार) युएईको आयोजना र कायकल्पको सहकार्यमा गएको शुक्रबार बरदुबईस्थित सिन्ध पञ्जाबको हलमा भानुजयन्ती मनाइएको हो ।
कार्यक्रममा स्रष्टा तथा कलाकारहरुको बाक्लो उपस्थिति थियो । कार्यक्रमका सभापति नेपाली समुदाय यूएईका संस्थापक अध्यक्ष तथा अभियन्ता बिदुर राउतले भानुभक्तको प्रतिमामा माल्यार्पण गरेसँगै राष्ट्रिय गाना गाउँदै शुभारम्भ भएको थियो । प्रमुख अतिथि घनश्याम नेपालका साथै अतिथिहरुमा विश्वराज न्यौपाने, तोया चौलागाइँ, कृष्णप्रसाद भट्टराई र आर पि सिर्जन थिए ।
कार्यक्रममा राजकुमार तिवारी, हरि न्यौपाने, ताराप्रसाद सापकोटा, कृष्ण पारस दुलाल, सुवास शर्मा र डि एल घिमिरेलगायतले आफ्नो सिर्जनाहरु सुनाएका थिए, भने गायक प्रकाश मगर, गीतकार सूजन कोई राईलगायतका कलाकारहरुले गीतहरु प्रस्तुत गरेका थिए । कार्यक्रमलाई प्रभु बैंक, शुभयात्रा ट्राभल्स, फूलबारी रेस्टुरेन्ट, सन एन्ड मुन ट्राभल, काठमाडौं प्यालेस रेस्टुरेन्ट र प्रान फूडले प्रयोजन गरेका थिए । कार्यक्रममा नेपाल राष्ट्र बैंकले केही समयअघि जारी गरेको वैदेशिक रोजगार बचतपत्र नेपालीहरुले खरिद गरेका थिए । त्यसको प्रमाणपत्र सोही कार्यक्रममा हस्तान्तरण गरिएको थियो ।