काठमाडौं । काठमाडौंको शङ्खमूलनजिक शनिबार साँझ भएको मोटरसाइकल दुर्घटनामा एकजनाको मृत्यु भएको छ ।
अर्का एकजना घाइते भएका छन् । कोटेश्वरबाट कोरिडोर सडक हुँदै शङ्खमूलतर्फ आउँदै गरेको बा.३६प ६५३१ नम्बरको मोटरसाइकल र सोही दिशातर्फ आउँदै गरेको प्रदेश ३०२००६ प ८८०० नम्बरको मोटरसाइकल ठक्कर खाँदा उक्त दुर्घटना भएको महानगरीय प्रहरी परिसर काठमाडौंले जनाएको छ ।
साँझ ६:४५ बजे भएको उक्त दुर्घटनामा सख्त घाइते भएका कोटेश्वरका २२ वर्षीय सुदीप तिमिल्सिनाको नागरिक अस्पताल बानेश्वरमा उपचारका क्रममा ७:२५ बजे मृत्यु भएको परिसरका प्रवक्ता प्रहरी नायब उपरीक्षक प्रमेश विष्टले जानकारी दिए ।
अर्का मोटरसाइकलमा सवार सानु खान घाइते रहेको र उनको सोही अस्पतालमा उपचार भइरहेको बानेश्वर प्रहरीले जनाएको छ । सीसी क्यामेराको फुटेज हेरेपछि मात्रै घटनाबारे थप विवरण खुल्ने प्रहरीले जानकारी दिएको छ । -रासस