काठमाडौं । मोरङको बिराटनगर महानगरपालिकाको मतगणना अझै सुरु हुन सकेको छैन । दलहरुले मतगणना स्थलमा एक जना पदाधिकारीका लागि कम्तिमा एक जना प्रतिनिधि राख्न पाउनुपर्ने बताएपछि सर्वदलीय बैठकमा सहमति जुट्न सकेको छैन । 

निर्वाचन आयोगका प्रतिनिधिले ठाउँ सानो रहेका कारण पनि एउटा दलबाट एक र बढीमा दुई जना भन्दा धेरै प्रतिनिधि राख्न नसकिने बताउँदै आएको छ । यसै विषयमा आयोग र दलहरुबीच सहमति हुन सकेको छैन । 

विराटनगरको आदर्श स्कुलमा महानगरको मतगणना गर्ने तयारी भइरहेको छ । 

यसअघि साढे ११ बजेबाट मतगणना सुरु हुने भनिएको थियो । विराटनगर महानगरमा नेपाली कांग्रेसका तर्फबाट मेयरको उमेदवारमा भीम पराजुली, एमालेका तर्फबाट बिनोद ढकाल तथा समाजबादी फोरम र माओवादी केन्द्र गठबन्द्धनका तर्फबाट मेयरमा उमेशकुमार यादवले उमेदवारी दिएका छन् । एमालेले फोरम लोकतान्त्रिकसँग गठबन्द्धन गरेको छ । एमालेले उपमेयरमा फोरम लोकतान्त्रिककी सूची चौधरीलाई उठाएको छ । 

१९ वटा वडा रहेको विराटनगरमहानगरमा १ लाख १२ हजार ८३२ मतदाता छन् । विराटनगर महानगरमा ११९ मतदान केन्द्र तोकिएको थियो । मोरङमा ७० प्रतिशत मतदान भएको छ ।