भैरहवा । रुपन्देहीका सहरी क्षेत्रमा भन्दा ग्रामीण क्षेत्रका मतदातामा बढी उत्साह देखिएको छ । रुपन्देहीका मर्चवार, धकधई, लुम्बिनी क्षेत्रमा मतदाताको उत्साहपूर्ण सहभागीता छ ।
ग्र्रामीण क्षेत्रहरुमा महिला मतदाता बढी देखिएका छन् ।
रुपन्देहीको मर्चवारअन्तर्गत कोटहीमाई, सम्मरीमाई, मायादेवी र मर्चवारी गाउँपालिका तथा लुम्बिनी सांस्कृतिक नगरपालिकामा चुनाव बहिष्कारको घोषणा गरेको राजपाका नेता कार्यकर्ता नै चुनावमा स्वतन्त्र उम्मेदवारी दिएर चुनावमा भाग लिएपछि उत्साह झनै छ । १ सय ७१ जना त्यस्ता कार्यकर्ता चुनावी मैदानमा छन् ।
रुपन्देहीको मर्चवार क्षेत्रका अधिकांश मतदान केन्द्रमा महिला तथा किसानको मतदान गर्ने लाइन लागेको छ । यसअघि मतदानमा भाग नलिएका यहाँका महिला तथा किसान पनि बुधबार निकै उल्लासमय वातावरणमा भोट दिन लाइनमा बसेका छन् । लुम्बिनी क्षेत्रको लुम्बिनी सांस्कृतिक नगरपालिकामा चुनाव बहिष्कार गर्ने घोषणा गरेको राष्ट्रिय जनता पार्टीका नेता, कार्यकर्ताले पनि स्वतन्त्र रुपमा भाग लिएका छन् ।
चुनाव बहिष्कारले जनताको मन जित्न र शासन सत्तामा पहुँच बढाउन नसकिने भएकाले चुनावमा आएको उनीहरु बताउँछन् ।