काठमाडौं । रोल्पा नगरपालिका वडा नं. १० मा रहेको भनभने मतदान केन्द्रमा मत पेटिकाभित्र एसिड हालेको पाइएको छ । रोल्पाका प्रमुख जिल्ला अधिकारी डा. डिजन भट्टराईका अनुसार बिहान करिब साढे १० बजे मतपेटिकाभित्र एसिड हालिएकाले तीन घण्टा मतदान स्थगित भएको थियो ।

उक्त केन्द्रका राजनीतिक दलका प्रतिनिधले पुनः मतदान  सुचारु गर्न सहमत भएकाले जलेका मतपत्रलाई बदर गरेर मतदान सुचारु हुने भट्टराईले जानकारी दिए ।

एसिडबाट ६/७ वटा मतपत्र मात्रै जलेको र मतदान नरोकिने उनले बताए । भनभनेमा करिब ६ सय मतदाता रहेकोमा करिब १५० मत खसिसकेको थियो ।

मतपेटिकामा तेजाब हालेपछि स्थगित रोल्पा नगरपालिका– १० स्थित जनता आधारभूत विद्यालय भवनमा मतदान केन्द्रको मतदान प्रक्रिया ढिलागरी मात्रै पुनः सञ्चालन भएको हो ।
सर्वदलीय बैठकको निर्णयानुसार स्थगित मतदान पुनः सञ्चालन गर्ने सहमति भएको थियो । त्यसपछि मतदान सुरु भएको मतदान अधिकृत भरतमणि पाखरेलले जानकारी दिए ।
एक सय ५० मत खसिसकेपछि एक अपरिचित व्यक्तिले लुकाएर लगेको तेजाब मतपेटिकामा खन्याएका थिए । तेजाव खन्याएपछि मतपेटिकामा रहेका १५ मत जलेको बताइएको छ । सर्वदलीय बैठकपछि मतदान नगरेकाहरुलाई मात्र मतदान प्रक्रियामा समावेश गराइएको छ । तर जलेका १५ मत भने रद्द गर्ने सहमति भएको छ ।
तर एसिड कसले हालिदियो भन्ने पुष्टि हुन सकेको छैन । 
यसैबीच घटनास्थलतर्फ जान भनी सदरमुकामबाट हिँडेको मुख्य निर्वाचन अधिकृत कमलप्रसाद ज्ञवालीको टोली बाटामा गएको पहिराका कारण सदरमुकामतर्फ फिर्ता भएको छ । 
त्यसबाहेक रोल्पाका सबैजसो मतदान केन्द्रमा शान्तिपूर्ण ढङ्गले मतदान भएको छ । नेकपाका कार्यकर्ताले नेपाली कांग्रेससँग सहकार्य गरी स्वतन्त्र उम्मेदवारी दिएपछि थवाङीहरु निर्वाचनमा सहभागी भएसँगै त्यहाँको सुरक्षा अवस्था सहज भएको बताइएको छ ।
त्यसैगरी     रोल्पा नगरपालिका–८ मा रहेको मतदान केन्द्रबाट १०३ वर्षीय गङ्जबहादुर ओलीले मतदान गरेका छन् ।  उनी जिल्लामा सबैभन्दा बढी उमेरका मतदाता हुन् । ओलीले सो मतदान केन्द्रमा आफन्तको सहयोगमा पहिलो मत खसालेका थिए ।

मतदानपछि प्रतिक्रिया दिँदै ओलीले गाउँघरको विकास गर्ने आशाले मतदान गरी आफ्नो सपना पूरा भएको देख्न चाहेको बताए । “राम्रो उमेदवार हेरेर मतदान गरेको छु”, ओलीले भने ।
जिल्लामा हालसम्म करिब ६० प्रतिशत मतदान भइसकेको बताइएको छ । यहाँ १५४ मतदान केन्द्र र ८० मतदानस्थल छन् । जिल्लामा पुरुष मतदाता ५६ हजार ७८६ र महिला मतदाता ६० हजार ४७५  छन् । राससको सहयोगमा