काठमाडौं । इंग्ल्यान्डले घरेलु मैदानमा जारी आइसीसी महिला एकदिवसीय विश्वकप क्रिकेटमा पहिलो जित हासिल गरेको छ । बर्षाले प्रभावित मंगलबार राती भएको खेलमा पाकिस्तानलाई डकवर्थ लेविस (डिएल) का आधारमा १०७ रनले पराजित गर्दै पहिलो जित निकालेको हो ।
लेष्टरमा भएको खेलमा टस हारेर पहिले ब्याटिङ गरेको इंग्ल्यान्डले निर्धारित ५० ओभरमा ७ विकेटको क्षतिमा ३७७ रनको योगफल तयार गरेको थियो । इंग्ल्यान्डको उच्च योगफलमा शतकीय पारी खेलकी नाताली सिभर र कप्तान हिथर नाइटले तेस्रो विकेटका लागि २१३ रनको साझेदारी गरेका थिए ।
सिभरले १३७ तथा कप्तान नाइटले १०६ रनको शतकीय पारी खेलिन् । पाकिस्तानकी अस्माभी इकबालले ३ विकेट लिईन । इंग्ल्यान्डले बनाएको यो स्कोर महिला विश्वकपमा दोस्रो ठूलो योगफल हो । यसअघि अष्ट्रेलियाले सन् १९९७ मा डेनमार्क्विरुद्ध ३ विकेटको क्षतिमा बनाएको ४१२ रन महिला विश्वकपमा अहिलेसम्मको सर्वा्धिक योगफल हो ।
इंग्ल्यान्डले दिएको ३७८ रनको लक्ष्यसहित पाकिस्तानले जवाफी ब्याटिङ्ग गरिरहदा खेल बर्षाले प्रभावित गर्यो । त्यसपछि डकवर्थ लेविस (डिएल) का आधारमा पाकिस्तानले २९ ओभर २ बलमा २१५ रनको नयाँ लक्ष्य पायो । तर, पाकिस्तानले निर्धारित २९ ओभर २ बलमा ३ विकेटको क्षतिमा मात्र १०७ रन बनाउन सक्यो ।
पाकिस्तानकी आयशा जाफरले अविजित ५६ तथा नैन अविदीले अविजित २३ रन जोडिन । इंग्ल्यान्डकी क्याथरिन ब्रुन्टले २ विकेट लिइन् । यो जितसँगै दुई खेलबाट इंग्ल्यान्डले २ अंक जोडेको छ । र, इंग्ल्यान्ड तेस्रो स्थानमा छ । पहिलो खेलमा इंग्ल्यान्ड भारतसँग पराजित भएको थियो । पाकिस्तानको यो लगातर दोस्रो हार हो । अंकबिहिन पाकिस्तान पहिलो खेलमा दक्षिण अफ्रीकासँग पराजित भएको थियो ।