काठमाडौं । नेपाली नम्बर एक महिला गल्फर प्रतिमा शेर्पा विशेष प्रशिक्षणका लागि अमेरिका जाने भएकी छिन् । नेपाल गल्फ एसोसियसनको सहयोगमा प्रतिमा आगामी जुलाईमा अमेरिका जाने भएकी हुन् ।
करिब दुई महिना अमेरिकामा विशेष प्रशिक्षण र केही प्रतियोगितामा सहभागी हुन प्रतिमा जुलाई २ तारिखमा अमेरिका प्रस्थान गर्ने छन् । प्रतिमासँगै प्रशिक्षक सचिन भट्टराई पनि अमेरिका जाने छन् । १८ वर्षकी प्रतिमाले अमेरिकाको भेनचुरास्थित  ओलिभा  लिंक  गल्फ कोर्षमा विशेष प्रशिक्षण लिनेछिन्  । त्यस्तै प्रतिमाले टाइटलिस्ट पर्फर्मेन्स इन्स्टिच्युटमा फिटनेस सम्बन्धी एक हप्ते तालिम लिनेछिन् ।
प्रतिमा पहिलोपटक विशेष प्रशिक्षणका लागि नेपाल बाहिर जान लागेकी हुन् । नागरिकता नहँुदा अघिल्ला टुरहरु गुमाएकी प्रतिमाले ३ महिना अघि मात्र नागरिकता पाएकी थिइन् । र, प्रतिमाले यो भ्रमणलाई गल्फ करियरमा उपलब्धिमुलक हुने विश्वास लिएकी छिन् । “अमेरिकामा मैले अझै राम्रो ट्रेनिङ, खेल्ने र सिक्ने मौका पाउने छु,” पाँचौ हाण्डीक्याप प्रतिमाले भनिन्, “त्यहाँबाट फर्किएपछि मैले यहाँ अझ राम्रो गर्ने छु र अन्तर्राष्ट्रिय प्रतियोगितामा समेत राम्रो गर्ने विश्वास लिएको छु ।” 
प्रतिमा नेपालमा नेपाली गल्फ खेलकुदमा उदीयमान खेलाडी हुन् । नेपाली महिला गल्फमा पछिल्लो समय प्रतिमाको दबदबा छ । प्रतिमाले अहिलेसम्म ३२ वटा एमेच्योर गल्फ प्रतियोगिताको उपाधि जितिसकेकी छिन् । प्रतिमाले यो प्रशिक्षणलाई आफ्नो करियरले थप उचाई लिने विश्वास समेत लिएकी छिन् । अमेरिका प्रशिक्षणको लागि नेपाल गल्फ एसोसियसन र कतार एयरवेजलाई धन्यवाद दिँदै प्रतिमाले थपिन्, “यो प्रशिक्षणले मलाई प्रोफेसनल खेलाडी बन्न सहयोग पुग्ने विश्वास छ ।”
प्रतिमाले अमेरिकमा रहदा प्रशिक्षणबाहेक तीन प्रतियोगितामा सहभागिता जनाउने छिन्  । प्रतिमाले जुलाई १८ देखी २१ सम्म हुने ५० औं टाइटलिस्ट म्याच प्ले च्याम्पियनसिप, जुलाई ३१ मा हुने फाउण्डर कप र अगस्ट ५ – ६ मा हुने टेलरमेड टुर च्याम्पियनसिप खेल्ने छिन् ।
अमेरिकामा रहँदा लाग्ने दुवैको खर्च नेपाल गल्फ एसोसियसनले बेहोर्ने छन् । यस्तै प्रतिमा र प्रशिक्षक सचिनको अमेरिका जाने आउने टिकट कतार एयरवेजले प्रायोजन गर्नेछन् । मंगलबार आयोजित एक कार्यक्रमका बीच प्रतिमालाई कतार एयरवेजले टिकट हस्तान्तरण गरेको थियो । प्रतिमालाई एयरवेजको नेपाल प्रमुख जय प्रकाश नायरले टिकट हस्तान्तरण गरे ।
प्रतिमा र प्रशिक्षक सचिनको अमेरिकाको दुईतर्फी टिकट प्रायोजन गरेपछि बोल्दै एयरवेजको नेपाल प्रमुख नायरले विश्व खेलकुदमा कतार एयरवेज जोडिरहेको उल्लेख गर्दै प्रतिमा जस्ता प्रतिभावान खेलाडीलाई सहयोग गर्न पाउनु खुशी भएको बताए । 
“कतार एयरवेज विश्वको चर्चित क्लब बार्सिलोनासँग सहकार्य गर्दै आएको छ,” एयरवेजका नेपाल प्रमुख नायरले भने, “मलाई आशा छ प्रतिमाले त्यहा राम्रो गर्ने छन् । खेलकुदबाट प्रतिमाले नेपालको नाम राख्ने छन् र प्रतिमा जस्ता खेलाडीलाई सहयोग गर्नु हाम्रो लागि खुशीको कुरा हो ।”