काठमाडौं । अमेरिकी राष्ट्रपति डोनाल्ड ट्रम्प र भारतीय प्रधानमन्त्री नरेन्द्र मोदीले पाकिस्तानलाई आफ्नो भूमी आतंकवादी क्रियाकलापमा प्रयोग हुन नदिन आग्रह गरेका छन् ।

दुई राष्ट्राध्यक्षबीच भएको भेटवार्तापछि जारी गरिएको संयुक्त वक्तव्यमा पाकिस्तानलाई आतंकवाद विरुद्ध कदम चाल्नको लागि आग्रह गरिएको हो । पाकिस्तानमा रहेका आतंकवादी समूहले भारतमा हमला गर्ने गरेको आरोप नयाँ दिल्लीले लगाउँदै आएको छ ।

भेटका क्रममा अमेरिकाले कश्मीरी विद्रोही साइद सल्लाहुदिनलाई विश्वका आतंककारीको सूचीमा सुचिकृत गरेकोमा पनि भारतले धन्यवाद दिएको छ । साथै पाकिस्तानलाई आफ्नो केन्द्र बनाई अन्य क्षेत्रमा आतंकवादी क्रियाकलाप चलाइरहेको जइस–इ–मोहम्मद र लस्कर इ तोइवा विरूद्ध लड्नको लागि दुई देशबीच सहकार्य अझ बलियो बनाउनेबारे कुराकानी भएको ह्वाइट हाउसले जनाएको छ ।

दुबै देशका प्रमुखले पाकिस्तानलाई २००८ मा भएको मुम्बइ हमला र गत वर्षको पठानकोट हमलामा संलग्नलाई कानुनी दायरामा ल्याउन सुझाव समेत दिएका छन् । भेटवार्ताका क्रममा ट्रम्प र मोदबीच दुई देशबीचको व्यापारिक सम्बन्ध सुधारबारे पनि कुराकानी भएको जनाइएको छ ।