काठमाडौं । उपत्यकालगायत सातै प्रदेशमा समुदायमा कोरोना भाइरसको संक्रमणको अवस्था पत्ता लगाउन एन्टिबडी परीक्षण गरिने भएको छ । स्वास्थ्य तथा जनसंख्या मन्त्रालयअन्तर्गतको इपिडिमियोलोजी तथा रोग नियन्त्रण महाशाखा (ईडीसीडी)ले विश्व स्वास्थ्य संगठन (डब्लूएचओ) को प्राविधिक सहयोगमा आगामी साताबाट सातै प्रदेशको समुदायमा एन्टिबडी परीक्षण (सेरो प्रिभिलेन्स अध्ययन ) अघि बढाउने तयारी भएको जनाएको छ ।
महाशाखाका निर्देशक डा. वासुदेव पाण्डेले पछिल्लो समय महिलामा संक्रमणको प्रतिशत बढेको र कुनै पनि ट्राभल हिस्ट्री नभएका संक्रमित बढ्न थालेकोले संक्रमण समुदायमा फैलिएको भन्न सकिने बताए । उनले भने, "तर, समुदायमा कोरोना कुन अवस्था छ भन्ने पत्ता लगाउन एन्टिबडी परीक्षणबाट नै थाहा हुने हो ।"
पहिला पुरुष कोरोना संक्रमित बढी थिए भने महिला कम थिए । अहिले महिलामा कोरोना संक्रमण हुने प्रतिशत बढेको उनी बताउँछन् ।
अहिले एन्टिबडी परीक्षणबारे कर्मचारीहरुलाई तालिम दिने काम भइरहेको उनले जानकारी दिए । उनले भने, “आगामी साताबाट सातै प्रदेशमा एकैपटक समुदायमा एन्टिबडी परीक्षण गर्ने तयारी छ ।”
यो सर्भे कतिमा गर्नेभन्दा पनि यसैको एक 'मेथड' हुन्छ सोही अनुसार गरिने उनले बताए ।
पछिल्लो समय कोरोना संक्रमित महिला करिब ३० प्रतिशत रहेका महाशाखाले जनाएको छ ।
यसैगरी, सहिद शुक्रराज ट्रपिकल तथा सरुवा रोग अस्पतालका सरुवा रोग विशेषज्ञ एवम् भाइरोलोजिस्ट डा. शेरबहादुर पुनले (सेरो प्रिभिलेन्स अध्ययन) एन्टिबडी परीक्षणबाट समुदायमा कोरोना कुन अवस्थामा रहेको थाहा हुने बताए । यो सर्भे धेरै जनाको नमुना लिएर एकैपटक गर्न सकिने उपयुक्त विधि रहेको उनले जानकारी दिए ।
उनले भने, “यो सर्भेबाट कुनै एक तोकिएका क्षेत्रहरुका व्यक्तिहरुको रगत लिएर गरिन्छ ।”
पीसीआर परीक्षणजस्तो लामो समय लाग्दैन, यो छिटो रिपोर्ट आउने उनले जानकारी दिए । उनका अनुसार यसरी परीक्षण गर्दा आगामी दिनमा कसरी जाने योजना बनाउन पनि सजिलो हुन्छ ।
