बेरुत । लेबनानको राजधानी बेरुतमा सरकारी विरोधी प्रदर्शनहरु सुरु भएका छन् । प्रदर्शनकारीहरुलाई लेबनानी सुरक्षा फौजले रोक्न खोज्दा झडप भएको छ ।
संसद भवननजिक भएको झडपको स्थितिलाई नियन्त्रणमा लिन सुरक्षाकर्मीहरुले दर्जनौं सेल अश्रुग्यास प्रहार गरेका छन् ।
मंगलबारको शक्तिशाली विस्फोटमा सरकारको लापरबाही मुख्य कारण भएको भन्दै सरकारविरोधी प्रदर्शनहरु सुरु भएका हुन् । शनिबार पनि बृहत् प्रदर्शनका लागि आह्वान गरिएको छ ।
मंगलबार राति भएको विस्फोट सन् २०१३ देखि असुरक्षित रुपमा राखिएको 'विस्फोटक' मानिने दुई हजार ७५० टन 'अमोनियम नाइट्रेट' भण्डारण गोदाममा विस्फोट भएको हो ।
सरकारी लापरबाहीका कारण विस्फोट भएको भन्दै नागरिकहरु सरकारविरुद्धको प्रदर्शनमा उत्रिएका हुन् । उक्त विस्फोटमा १३७ जनाको मृत्यु भएको छ भने पाँच हजारभन्दा बढी घाइते भएका छन् ।
विस्फोटमा परेका अझै दर्जनौं मानिसको पत्ता लाग्न सकेको छैन । सहरका हजारौंको रोजगारी गुमेको छ भने सयौं व्यापार, व्यवसाय ध्वस्त भएको छ । लेबनानका सरकारी सञ्चारमाध्यमका अनुसार अनुसन्धानका लागि १६ जनालाई नियन्त्रणमा लिइएको छ ।
सैन्य अदालतका एक सरकारी प्रतिनिधिका अनुसार विस्फोटन भएको बन्दरगाहका अधिकारी, मर्मत संहारमा खटिने कामदार र उक्त रसायन भण्डारण गरिएको गोदामका कामदार गरी १८ जनासँग सोधपुछ गरिएको छ ।
नेतृत्वमा गहन परिवर्तन आवश्यक : म्याक्रोन
विस्फोटपछि बेरुत भ्रमणमा गएका फ्रान्सका राष्ट्रपति इमानुएल माक्रोनले लेनबनानको नेतृत्वमा ‘गहन परिवर्तन’को आवश्यकता रहेको बताएका छन् । तहसनहस भएको उक्त सहर भ्रमण गरेका माक्रोनले घटनाबारे अन्तर्राष्ट्रिय अनुसन्धान गरिनुपर्नेसमेत बताएका छन् ।
लेबनानका राष्ट्रपति मिसेल आओनले असुरक्षित रूपमा राखिएको दुई हजार ७५० टन अमोनियम नाइट्रेटका कारण विस्फोटन भएको बताएका छन् ।
राष्ट्रपति म्याक्रोनले यस विस्फोटलाई पछिल्लो संकटका रुपमा व्याख्या गर्दै नयाँ समझदारीको आवश्यकता रहेको बताएका छन् । लेबननका लागि लगानी उपलब्ध रहेको तर त्यसका लागि नेताहरूले सुधारका कार्यक्रम लागु गर्नुपर्ने उनले बताए ।
सन् २००५ मा भएको पूर्वप्रधानमन्त्री रफिक हरिरीको हत्याको मुद्दामा फैसला आउनुभन्दा केही समय अगाडि उक्त ठूलो विस्फोटन भएको हो । -बीबीसी
