दाङ । शान्तिनगर गाउँपालिका वडा नं २ वडाध्यक्ष फर्साराम डाँगीमाथि कार्यकक्षमै आक्रमण भएको छ । उनीमाथि बिहान सवा ११ बजेतिर १०/११ जनाको अज्ञात समूहले कार्यकक्षमै प्रवेश गरी रड र लाठीले निर्घात कुटपिट गरेको जिल्ला प्रहरी प्रवक्ता सुमित खड्काले जानकारी दिए ।
वडाध्यक्षको हाल तुलसीपुरस्थित राप्ती प्रादेशिक अस्पतालमा उपचार भइरहेको छ । घाइते वडाध्यक्षको अवस्था बुझ्न प्रमुख जिल्ला अधिकारी गोविन्द्रप्रशाद रिजाल, जिल्ला प्रहरी प्रमुख गणेश चन्द लगायतका सुरक्षा अधिकारीहरु अस्पताल पुगेका थिए ।
उनको थप उपचारका लागि काठमाडौं लगिने भएको छ । दाङका प्रजिअ रिजालले घाइते वडाध्यक्षलाई उपचारका लागि काठमाडौं लैजान हेलिकोप्टर मागिएको जानकारी दिए । ‘हेलिकोप्टर मागिएको छ, आएपछि काठमाडौं लैजाने तयारी गरिएको छ,’ रिजालले भने ।
यसैबीच डाँगीमाथि कार्यकक्षमै भएको आक्रमणको नेपाली काँग्रेस दाङले निन्दा एवं भर्त्सना गरेको छ । घाइते डाँगीको अवस्था बुझ्न राप्ती प्रादेशिक अस्पताल तुलसीपुरमा पुगेका काँग्रेस दाङका सभापति कीर्तिबहादुर खड्काले घटनाका दोषीहरुलाई तत्काल पक्राउ गरी कारबाही गर्न माग गरे ।
जनप्रतिनिधिमाथि वडा कार्यालयभित्रै भएको आक्रमणले सरकार छ कि छैन ? भन्ने प्रश्न खडा भएको उनले बताए । घाइते डाँगीलाई भेट्न कांग्रेस जिल्ला सचिव शंकरप्रशाद डाँगी, क्षेत्र नम्बर ३ का सभापति जगतबहादुर खड्का काँग्रेसका नेता केशव आचार्य अस्पताल पुगेका थिए ।
शान्तिनगर गाउँपालिकाका अध्यक्ष कमानसिंह डाँगीले घटनाको निन्दा गरे । उनले तत्काल आक्रमणकारीलाई पक्राउ गरी कानुनी कठघरामा उभ्याउन माग गरे ।