काठमाडौं । लोकप्रिय सामाजिक सञ्जाल फेसबुकका संस्थापक मार्क जुकरबर्ग १३ वर्षपछि हार्वर्ड विश्वविद्यालयको पुरानो होस्टलको कोठामा पुगेका छन्, जहाँबाट उनले १३ वर्ष पहिले फेसबुकको पहिलो लन्च गरेका थिए ।
कुनै बेला आफू बसेको कोठामा पुगेका अर्बपति मार्कले आफ्ना कलेजका दिनहरू र आफ्नी पत्नी प्रिसिला चानसँग भएको भेटघाटको सम्झना गरे । यस क्रममा उनी निकै भावुक बन्न पुगेको समाचारमा बताइएको छ ।
एजेन्सीहरूले दिएको समाचारअनुसार जुकरबर्गले आफू होस्टल पुगेको भिडियोसमेत सेयर गरेका छन् । जुकरबर्गले ग्य्राजुएसन पूरा गरेका छैनन् तर विश्वविद्यालयले उनलाई बिहीबार मानार्थ उपाधि दिन लागेको छ । उनले दीक्षान्त समारोहलाई सम्बोधन समेत गर्दैछन् ।
मंगलबार पोस्ट गरेको २३ मिनेट लामो भिडियोमा जुकरबर्गले भनेका छन्, ‘‘१३ वर्षअघि मैले जुन ठाउँ छोडेको थिएँ, त्यहाँ म पहिलो पटक फर्केर आएँ । यो त्यही ठाउँ हो, जहाँ मेरो जीवनका अनेकौं सुनौला पल बिते ।’’
जुकरबर्ग त्यतिखेर किर्कल्यान्ड हाउस होस्टलको एच ३३ कोठामा बस्ने गर्थे । त्यहीँ बसेकै बेला उनले ४ फरवरी २००४ मा आफ्नो ल्यापटपमा फेसबुक लन्च गरेका थिए । जुकरबर्गकी पत्नी प्रिसिला पनि त्यतिखेर त्यसै होस्टलमा बस्थिन् । दुबैको पहिलो भेटघाट त्यहीँ भएको थियो । प्रिसिलाले भनेकी छन्, ‘‘होस्टलमा बस्दा म १८ वर्षकी थिएँ र जुकरबर्ग १९ का । हाम्रो विवाह १९ मई २०१२ मा भयो ।’’
जुकरबर्गले आफ्नो ग्य्राजुएसन पूरा हुनुअघि नै होस्टल छोडेका थिए र आफ्नो सम्पूर्ण ध्यान सोसल नेटवर्किङ प्लेटफर्मलाई विकसित गर्नमा लगाएका थिए । आज फेसबुक दुनियाँको सबैभन्दा लोकप्रिय सामाजिक सञ्जाल बनेको छ र यसका प्रतिमहिना झन्डै २ अरब प्रयोगकर्ता छन् ।
जुकरबर्गले अपलोड गरेको होस्टल जीवनसँग सम्बन्धित भिडियो अहिले फेसबुकमा भाइरल भइरहेको छ ।