नयाँदिल्ली । भारतले हाइड्रोक्सिक्लोरोक्वाइनको निर्यातमा लगाएको प्रतिबन्ध हटाएको छ ।
यसअघि अमेरिकी राष्ट्रपति डोनाल्ड ट्रम्पले यस औषधिलाई कोरोना भाइरसको उपचारका लागि 'गेम चेन्जर' हुने बताएका थिए । यसअघि हाइड्रोक्सिक्लोरोक्वाइनलाई मलेरियाविरुद्धको औषधिका रुपमा प्रयोग गरिँदै आएको थियो । यसलाई एन्टिभाइरल औषधिका लागि केही मुलुकमा अहिले पनि प्रयोग गरिँदै आएको छ ।
ट्रम्पले हाइड्रोक्सिक्लोरोक्वाइनलाई कोरोनाको औषधिको दाबी गर्दै आए पनि चिकित्सा विज्ञहरुले भने यसको कुनै प्रमाण नभेटिएको बताएका थिए । भारत हाइड्रोक्सिक्लोरोक्वाइनको सबैभन्दा ठूलो उत्पादक मुलुक हो । मार्चमा लकडाउनका कारण औषधि उत्पादनमा कमी आएसँगै भारतले निर्यातमा रोक लगाएको थियो ।
समाचार एजेन्सी रोयटर्सका अनुसार भारतले लकडाउनमा केही खुकुलो बनाएसँगै अप्रिलमा अमेरिकालाई पाँच करोड ट्याबलेट हाइड्रोक्सिक्लोरोक्वाइन निर्यात गरेको थियो ।
भारतले विभिन्न मुलुकमा माग भएअनुसार सरकारको स्वीकृतिमा हाइड्रोक्सिक्लोरोक्वाइन निर्यात गर्नुपर्ने प्रावधान गरेको थियो । अब यो प्रावधान पनि खुला गरेको हो । नेपालले पनि भारतलबाट मलेरियाका औषधिका लागि हाइड्रोक्सिक्लोरोक्वाइन आयात गर्छ । -बीबीसी