स्थानीय तह निर्वाचन अन्र्तगत मंगलबार बिहानसम्म करिब एकलाख दश हजार मतगणना भएको छ । अन्तर्वार्ता तयार गर्दासम्म करिब ६२ हजार मत गन्न बाँकी छ । यति मत गन्दा नेकपा एमालेका तर्फबाट काठमाडौं महानगरको मेयरमा उमेदवारी दिएका विद्या सुन्दर शाक्यले ३६ हजार ३६० मत ल्याएर अग्रता लिइरहेका छन् भने । प्रतिद्वन्द्वी कांग्रेसका राजुराज जोशी झन्डै दश हजार मतले पछि परेका छन् । मतगणनास्थल राष्ट्रिय सभागृहमा रहेका शाक्यलाई हिँड्दाहिँड्दै हामीले केही प्रश्न गरेका थियौँ । प्रस्तुत छ, उनीसँग बाह्रखरीका लागि अक्षर काकाले गरेको कुराकानीको सम्पादित अंश :
अन्तिम परिणाम त आइसकेको छैन । तर, अहिलेसम्मको परिणाम हेर्दा काठमाडौं महानगरमा नेकपा एमालेले विजयको झन्डा फहराउने अवस्था देखिन्छ, धेरैको आँकलन पनि यही छ । परिणामलाई कसरी लिनु भएको छ, अपेक्षाकृत नै छ ?
नेकपा एमाले यसपटक ढुक्क थियो– महानगरमा हामी अत्यधिक बहुमतले चुनाव जित्छौँ । हालसम्म जुन मत एमालेलाई प्राप्त भएको छ, त्यो हाम्रो अपेक्षा नै हो । तथापी मत अन्तिम मत परिणाम नआउँदासम्म ढुक्क हुने स्थितिचाहिँ छैन । जित्यौ भनेर भन्न हतारिनु पनि हुँदैन ।
अर्को, तेस्रो नम्बर र चौँथो नम्बरमा आउने विवेकशील र साझा पार्टीले जुन ढंगले मत महानगरमा प्राप्त गरेका छन्, त्यसले हामीलाई घोत्लिन बाध्य बनाएको छ । त्यस्तै महानगरजस्तो ठाउँमा अत्यधिक मत बदर भएका छन् । यसले कमी कमजोरीको उजागर गरेको छ ।
०७० को तुलनामा काठमाडौं महानगरपालिकामा एमालेको मत परिणाम निकै उत्साहजन देखियो, कारण के होला ?
काठमाडौं महानगरपालिकामा मतदाताहरू सधैँ एकैतिर लागेका छैनन्, तलाउको पानीजतो स्थिर छैनन्, यहाँका मतदाता । कुनै सयम यहाँ सबै क्षेत्रमा एमालेले जित्यो । कुनै समय हा¥यो पनि । हार्दा पनि थोरै मत परिणामको मात्रै अन्तर देखियो ।
०६४ सालमा भर्खरै चुनावी मैदानमा ओर्लिएको नेकपा माओवादीले महानगरमा राम्रै भोट पायो । ०७० सालमा नेपाली कांग्रेसले काठमाडौंमा आठ सिट जित्यो । तर, काम जनभावना अनुसार भएन ।
महानगरबासीको सपना पूरा हुने त परै जाओस्, दैनन्दिन झेल्नुपर्ने समस्या पनि किनारा लागेनन् । राष्ट्र र राष्ट्रियताको सवालमा उहाँहरूले लिएको अडान अस्पष्ट र कतिपय सन्दर्भमा राष्ट्रको हितमा नदेखिएकाले मतदाता चिढिएका थिए । त्यसको ‘रिफ्लेक्सन’ पनि यो चुनावमा देखियो । त्यस्तै एमालेको आफ्नै संगठनको बल पनि छ । संगठन निर्माण गर्ने क्रममा हामी निरन्तर जनताको बीचमा भएकाले मतदान अगावै हामीले यो परिणामको अपेक्षा गरेका थियौँ ।
तथापि हामीले अपेक्षा गरेका पाँच नम्बर, २५ नम्बरलगायतका केही वडा हामी झिनो मतान्तरले पराजित भएका छौँ । यी हामीले जित्ने सूचीमा राखेको वडा थियो ।
पार्टीले तपाईंलाई अन्तिम समयमा तपाईंलाई महानगर प्रमुखमा योग्य ठान्यो, उमेदवार उठायो । त्यस अगाडि विभन्न नामका सन्दर्भमा चर्चा परिचर्चा भएका थिए, एकलाख मत गन्दाको परिणाम हेर्दा तपाईं लोकप्रिय नै सावित हुनुभयो । पार्टी लोकप्रिय भएको कि विद्यासुन्दर आफैँ ?
यसमा द्विविधा मान्नुपर्ने कुरा छैन । विद्यासुन्दर होइन, नेकपा एमाले नै लोकप्रिय हो । विद्यासुन्दरको ठाउँमा अरुको कोही उठेको भए पनि यसपटक नेकपा एमालेले निर्वाचन जित्नेमा एमाले विश्वस्त थियो । राष्ट्रियता, राष्ट्रिय राजनीतिमा नेकपा एमालेले लिएको अडान, समृद्ध महानगरको सपनाका आदिका कारणले जनताको बीचमा पार्टी लोकप्रिय बनाएको थियो ।
उमेदवार टुंग्याउने सन्दर्भमा एमाले मात्रै पछि परेको होइन, अरूले पनि अन्तिम समयमा नै उमेदवारी टुंग्याएका हुन् । अर्को म दुई पटक वडाध्यक्ष भएर जनताको काम गरिसकेको मान्छे, काठमाडौं जिल्लाको पार्टी कमिटीको सचिव, पार्टीका कार्यकर्तासँग प्रत्यक्ष सरोकार राखेर काम गरिरहेको मानिस, यसलाई टिकट दिँदा महानगरको विकासको अगुवाइ गर्न सक्छ र महानगरको समृद्धिको लागि भूमिका खेल्न सक्छ भनेर पार्टीले विश्वास गरेकोचाहिँ पक्कै हो । र, त्यहिअनुसार परिणाम पनि देखिएको छ ।
यसपटकको निर्वाचनमा विवेकशील र साझा पार्टीले महानगरमा उल्लेख्य मत प्राप्त गरे, रञ्जु दर्शना र किशोर थापाहरूको उपस्थिति ठूला पार्टीहरूलाई चुनौती हो ?
यसबारे हामीले विश्लेषण गर्नै बाँकी छ । यी दुई पार्टीले महानगरमा यसरी मत ल्याउँछन् भन्ने व्यक्तिगत हिसाबले मैलेचाहिँ सोचेको थिइनँ । मैले अवमूल्यन गर्न खोजेको होइन । चुनावम होमिँदा प्रतिस्पर्धी पार्टीको आँकलन गर्नै पर्छ ।
मैले विवेकशील र साझा पार्टीलाई प्रतिस्पर्धी नै ठानेको थिइनँ । महानगरमा एमालेको प्रतिष्पर्धी कांग्रेस नै हो भन्नेमा हामी विस्वस्त थियौँ । तेस्रो नम्बरमा नेकपा माओवादी केन्द्र नै आउला भन्ने थियो । तर, अहिले पाँचौँमा खुम्चिन पुग्यो । र, विवेकशील र साझा क्रमशः तेस्रो र चौँथो शक्तिका रूपमा देखा परेका छन् ।
उनीहरूले मत प्राप्त गर्नु, जनताको विश्वास जित्नु महत्त्वपूर्ण कुरा होइन । मुख्य कुरा त उनीहरूको स्थिरता हुन्छ कि हुँदैन । जनताको बीचमा रहन्छन् कि रहँदैनन् भन्ने हो । उनीहरूको संगठन छैन । वडामा उमेदवारी दिनसमेत सक्नु भएको छैन ।
त्यसकारण छालजस्तो आउने, पछि सामसुम हुने पनि हुन सक्छ । अतः हतारिएर प्रतिक्रिया दिइहाल्ने बेला भएको छैन । कांग्रेस र एमालेले प्राप्त गरेको मत फगत लहडमा प्राप्त गरेको अभिमत होइन । यो त निरन्तर जनताको बीचमा काम गरेको परिणाम नै हो । जनताको बीचमा रहेका निरन्तर काम गर्न निकै गाह्रो छ ।
हामी उनीहरूले प्राप्त गरेको मतको सम्मान गर्छौं । उनीहरूले बोकेको उद्देश्य र हाम्रो घोषणापत्रबीच तात्विक अन्तर छैन । भाषा फरक होला । भोलिका दिनमा समृद्ध महानगर बनाउन उनीहरूसँग हामीले होतमालो गर्नेछौँ ।
उनीहरूलाई जनताले दिएको मतको सम्मान गर्दै उनीहरूसँग सहकार्य गरेर हिँड्न एमालेले कुनै कुञ्जुस्याइँ गर्दैन । समृद्ध महानगर कुनै एक पार्टीको मात्रै सपना किमार्थ हुनसक्दैन ।
जित्नेको मात्रै उत्तरदायित्व भन्ने कुरा हुँदैन, उमेदवारी दिनेको पनि आफ्नो जिम्मेवारी हुन्छन् । सबैको सहकार्य र साँझेदारीबाट नै महानगर समुन्नत बन्नेमा एमाले विश्वस्त छ ।