भक्तपुर । भक्तपुरको खरिपाटीस्थित क्‍वारेन्टाइनमा रहेका ७३ जनालाई आज घर पठाइएको छ । कोरोना प्रभावित विभिन्‍न देशबाट आएका उनीहरुलाई १४ दिनअघि भक्तपुरस्थित विद्युत् प्राधिकरणको भवनमा रहेको क्‍वारेन्टाइनमा राखिएको थियो । 
    
यहाँ रहेका सबैको कोरोना परीक्षण रिपोर्ट नेगेटिभ आएपछि उनीहरुलाई सेना र जिल्ला सुरक्षा निकायको पहलमा घरसम्म पुर्‍याउने गरी आज पठाइएको वीरदल गणका गणपति कर्णेल शिवप्रसाद पौडेलले जानकारी दिए । उनले खरिपाटीको क्‍वारेन्टाइनमा रहेका उपत्यकाभित्रका २६ सहित ७३ जनालाई आज घर फर्काइएको जानकारी दिए ।

घर फर्काउन सेनाका दुई र सार्वजनिक यातायात दुई गरी चार बसमा हालेर काठमाडौं, चितवन, झापा, बुटवल, नेपालगन्‍ज, मुग्लिङ, पोखरा, बनेपा र पाँचखाल पठाइएको पौडेलले जानकारी दिए । उनीहरुलाई बसमा खानाका लागि खानेकुरासमेत पठाएको उनले जानकारी दिए । -रासस

तस्बिर : सुनील प्रधान/बाह्रखरी