काठमाडौं । अर्थ र सञ्चार तथा सूचना प्रविधिमन्त्री युवराज खतिवडाले सञ्चार क्षेत्रमा पनि सेवा दिन्छु भनेर अनुमति लिएर सेवा नदिनेहरू रहेको आफूले पाएको दाबी गरेका छन् । सञ्चार तथा सूचना प्रविधि मन्त्रीको जिम्मेवारी सम्हालेपछि आफूले यस क्षेत्रमा पनि लाइसेन्स होल्ड गरेर बस्ने कम्पनीहरू रहेको भेटेको उनले बताएका हुन् ।

नेपाल दूरसञ्चार प्राधिकरणको २२औं वार्षिकोत्सवको अवसरमा मंगलबार उनले लाइसेन्स होल्ड गरी सेवा नदिने कार्य राष्ट्रिय रोग भएको आफूले महसुस गरेको दाबी गरे ।

उनले भने, “यता पनि लाइसेन्स लिने, सेवा नदिनेहरू हुँदा रहेछन् । र, किन दिएनौ भनेर कारवाही गर्दा अदालत धाउँदा रहेछन् । यो कुरा मन्त्री बनेपछि मात्र थाहा पाउँदै छु ।”

‘तिमीले गर्छु भनेका काम राम्रोसँग छिटो छरितो रुपमा सम्पन्न गर’ भन्दा अदालत गुहार्न जानेको अन्त्य हुनुपर्ने जोड उनले दिए । उनले भने, “लाइसेन्स होल्ड गर्नेहरू अन्यत्र छन् भन्ने सुनेको थिएँ, केही दिनदेखि यहाँ पनि त्यो रहेछ भन्ने बुझ्दै छु । यो त राष्ट्रिय रोग पो रहेछ ।”

सबैभन्दा छिटो काम गर्छु भनेर दुरसञ्चार सेवाको लाइसेन्स लिने, होल्ड गर्ने र काम नगर्ने सोचले मुलुको विकास र रुपान्तरण नहुने दाबी उनको छ । उनले भने, “यसरी डिजिटल नेपाल कहिले हुन्छौं । अर्थतन्त्र डिजिटल कसरी हुन्छ ?”