काठमाडौं । संविधान संशोधन प्रस्तावको पक्षमा मतदान गर्ने केही सांसद् नै अनुपस्थित भएपछि व्यवस्थापिका–संसद्को बैठक पनि २१ गतेसम्मका लागि सारिएको संसद् सचिवालय स्रोतले जानकारी दिएको छ ।
सत्तापक्ष नेपाली कांग्रेस र राप्रपाका कतिपय सांसद् नै अनुपस्थित थिए । संसद् सचिवालयका अनुसार ५९३ सदस्य रहेको संसद्मा आजको बैठकमा जम्मा ५११ जना उपस्थित थिए ।
संसद्को बैठक स्थगित हुँदासम्म जम्मा ५११ जना सांसद् उपस्थित भएको संसद् सचिवालयका प्रवक्ता डा. भरत गौतमले जानकारी दिए ।
उनका अनुसार सांसदहरु दिनभर संसद् बैठक चल्छ भन्ने सोचेर केही स्थगित भएपछि पनि उपस्थित भइरहेका छन् ।
स्रोतका अनुसार कांग्रेस र राप्रपाकै सांसद्हरु अनुपस्थित रहेको, १९ गतेको मनोनयन दर्ताका लागि हस्ताक्षर गर्ने जिल्ला प्रतिनिधिहरु पनि सांसद् नै भएकाले जिल्ला जान ढिलाई हुने देखेर २१ गतेसम्मका लागि बैठक स्थगित गरिएको हो ।
स्रोतका अनुसार राप्रपाले संसदीय दलको बैठकपछि ह्विप जारी गरे पनि केही सांसद्ले प्रस्तावको पक्षमा मतदान गर्न नसकिने बताउँदै आएका छन् ।