काठमाडौं । व्यवस्थापिका–संसद्को आइतबार बोलाइएको बैठकमा संविधान संशोधन प्रस्ताव अघि बढाउने तयारी थियो । त्यसका लागि संसद् सचिवालयले संविधान संशोधन प्रस्तावमाथि परेका संशोधन प्रस्तावलाई एकीकृत गर्ने काम पनि गरिसकेको थियो ।
आइतबार नै संसद्का दुईवटा बैठक बस्ने, पहिलो बैठकमा शोक प्रस्ताव पारित गर्ने र दोस्रो बैठकमा संविधान संशोधन प्रस्ताव अघि बढाउने तयारी थियो ।
तर शोक प्रस्ताव पारितपछि संसद्को बैठक २१ गतेसम्मका लागि स्थगित गरियो ।
किन ?
प्रधानमन्त्री पुष्पकमल दाहाल भन्छन्– संविधान संशोधन आजसम्म गर्ने भनेकै हो । तर उमेदवारी दर्ताको समय भएकाले सबै त्यतातर्फ लाग्नुपर्ने भयो । त्यसो हुँदा आज छलफल हुन सकेन । ३१ गतेको निर्वाचन उत्सवको रुपमा सफल पार्न त्यता होमिनुपर्ने भयो । उमेदवारी दर्ता गरिएपछि संविधान संशोधनको पनि काम अघि बढ्छ । मोर्चा पनि निर्वाचनमा आउँछ, तपाइँहरु ढुक्क हुनुहोस् । मिडियाले पनि निर्वाचन हुँदैन कि भनेर आशंका गर्नुपर्दैन ।”
नेपाली कांग्रेसका सभापति शेरबहादुर देउवाले पनि स्थानीय तहको निर्वाचन हुँदैन कि भनेर आशंका नगर्न आग्रह गरे ।
उनले भने– निर्वाचन हुन्छ । हुँदैन भनेर कसले भन्यो ?
नेकपा एमालेका नेता भिम रावलले भने संविधान संशोधन प्रस्तावमा एमालेले सहमति जनाउन नसक्ने बताए ।
उनले चुनावको बीचमा बजेट ल्याउने कुरा पनि एमालेलाई अमान्य हुने बताए । “एमालेको सार्वजनिक भएको धारणाअनुसार निर्वाचन एकैचरणमा गराउन पहल गर्ने र बजेट चुनावको बीचमा ल्याउनुहुँदैन भन्नेमा एमाले दृढ छ,” रावलले भने । माओवादी केन्द्रका नेता टोप बहादुर रायमाझीले संविधान संशोधन भन्दा निर्वाचन महत्वपूर्ण भएकाले सबै निर्वाचनमा होमिन संसद्को बैठक स्थगित गरिएको जानकारी दिए ।