काठमाडौं । स्पानियोललाई पराजित गर्दै बार्सिलोनाले स्पेनिस ला लिगा फुटबलको उपाधि जित्ने होडलाई कायम राखेको छ । लिग अन्तर्गत शनिबार राति भएको खेलमा स्पानियोललाई ३–० ले पराजित गर्दै बार्सिलोनाले उपाधि होड कायम राखेको हो ।
स्पानियोलको घरेलु मैदानमा भएको खेलमा बार्सिलोनालाई जित दिलाउन लुइस स्वारेजले दुई तथा इभान रेकिटिकले एक गोल गरे । पहिलो हाफमा गोल रहित बराबरीमा सकिएको खेलको दोस्रो हाफमा बार्सिलोनाले तीन गोल गर्दै सहज जित निकालेको हो ।
खेलको ५० औं मिनेटमा स्वारेजले गोल गर्दै बार्सिलोनालाई सुरुवाती अग्रता दिलाए । ७६ औं मिनेटमा रेकिटिकले बार्सिलोनाको अग्रता दोब्बर बनाए । त्यसपछि खेलको ८७ औं मिनेटमा स्वारेजले व्यक्तिगत दोस्रो गोल गरेपछि बार्सिलोनाले ३–० को सहज जित पायो ।
बार्सिलोनाको यो जितसँगै ला लिगाको उपाधि होड निकै रोमाञ्चक बन्दै गएको छ । लिगको उपाधि होडमा बार्सिलोना र रियल मड्रिड अघि छन् । लिगमा बार्सिलोनाले तीन खेल खेल्न बाकी छ । त्यस्तै रियल मड्रिडले लिगमा चार खेल खेल्न बाँकी छ । यस्तोमा शिर्ष स्थानको बार्सिलोना र रियल मड्रिडको समान ८१ अंक छ । गोल अन्तरमा बार्सिलोना शिर्ष स्थानमा छ ।
लिगमा बार्सिलोनाले भिल्लारियल, लास पालमस र एइबरसँग खेल्न बाँकी छ । त्यस्तै रियल मड्रिडले ग्रनाडा, सेभिल्ला, मालागा तथा सेल्टा डी भिगोसँग खेल्न बाँकी छ ।
स्पेनिस ला लिगा अन्तर्गत नै शनिबार राति भएको अर्को खेलमा एथ्लेटिको मड्रिडले लास पालमसलाई ५–० ले पराजित गरेको छ । त्यस्तै भिल्ला रियलले स्पोर्टीङ गजोनलाइ ३ – १ तथा रियल सोसीडाडले ग्रानाडालाइ २ – १ ले पराजित गरेको छ ।