काठमाडौं । मुम्बई इन्डियन्सले भारतमा जारी दशौ सस्करणको इन्डियन प्रिमियर लिग (आईपिएल) क्रिकेटमा सातौं जित निकालेको छ  । लिग अन्तर्गत शनिबार राति भएको खेलमा गुजरात लायन्सलाई सुपर ओभरमा पराजित गर्दै मुम्बईले सातौं जित निकालेको हो । 

राजकोटमा गुजरातले दिएको १५४ रनको लक्ष्य पछ्याएको मुम्बईले निर्धारित २० ओभरमा अलआउट हुदै १५३ रनमा समेटिएपछि खेल सुपर ओभरमा गएको थियो । तर, सुपर ओभरमा जसप्रित बुमराहले उत्कृष्ट बलिङ गरेपछि मुम्बईले जित आत्मसात गर्यो । 

सुपर ओभरमा पहिले ब्याटिङ गरेको मुम्बईले ११ रन बनाउदै जितका लागि गुजरातलाइ १२ रनको लक्ष्य दियो । जवाफमा गुजरातले ६ रनमात्र बनाएपछि मुम्बईले जित सातौं जित निकाल्यो । आईपिएलको यो सिजनमा सुपरओभरबाट खेलको निर्णय भएको यो पहिलोपटक हो । 

यसअघि टस जितेर पहिले ब्याटिङ गरेको गुजरातले निर्धारित २० ओभरमा ९ विकेट गुमाएर १५३ रन बनाएको थियो । उसका लागि इशान किसानको ४८ तथा रबिन्द्र जडेजाले २८ रनको योगदान दिए । मुम्बईका क्रुनल पाण्डेले ३ विकेट लिए । जवाफी ब्याटिङ गरेको मुम्बईले पार्थिव पटेलको ७० रनको अर्धसतकीय परिमा १५३ रन मात्रै बनाउन सक्यो ।  

यो जितसँगै मुम्बईले शिर्ष स्थानको कलकतासंग अंक बराबरी गरेको छ । ९ खेलमा ७ खेल जितेका मुम्बई १४ अंकसहित दोस्रो स्थानमा छ । कलकताको पनि समान १४ अंक छ तर रनरेटको आधारमा शिर्ष स्थानमा छ । तीन खेल मात्रै जितेको गुजरात भने ६ अंकसहित पाँचौं स्थानमा छ ।