काठमाडौं । नेपालमा पहिलोपटक ५ करोड लगानीमा चलचित्र बन्ने भएको छ । दीपेन्द्र के खनालले निर्देशन गर्ने चलचित्रमा लगानी सर्मिला पाण्डेले गर्ने भएकी छन् । पाण्डे चलचित्र ‘लभ लभ लभ’ कि निर्मात्री हुन् । यति ठूलो बजेटमा नेपालमा चलचित्र बन्न लागेको यो पहिलो पटक हो ।
निर्देशक खनालकै कथा रहने चलचित्रको नाम भने तय भइसकेको छैन । ‘मनमा धेरै नाम त छन् तर चित्त बुझिरहेको छैन,” निर्देशक खनालले भने, “मन परेको नाम जुरेपछि जानकारी गराउँछौं ।”
हिँडेर अमेरिका जाने तीन जना नेपालीको कथा चलचित्रको मुख्य विषय भएको उनले बताए । “अहिलेको समसामयिक विषय हो यो ।
अमेरिकाप्रतिको मोह चलचित्रको विषय हो । मलाई लाग्छ कुनै पनि देशले यस्तो नौलो चलचित्र बनाएका छैनन्,” निर्देशक खानलले भने, “सर्मिला दिदीले मलाई केही नौलो र विदेशमा पनि चलाउन सकिने चलचित्र बनाउनु पर्यो भन्नुभयो । त्यही भएर मैले यो कथा रोजेको हुँ ।”
उनले भारत, थाइल्यान्ड, ब्राजिल, पेरु, ग्वाटेमाला लगायत १३ देश हुँदै अमेरिका पुगिने र त्यहीँ छायांकन हुने भन्दै भने, “यसरी पैदल हिँड्ने क्रममा बाटोमै कतिले ज्यान गुमाउँछन्, हामीलाई पनि यो चुनौतिपूर्ण छ । तर, पनि हामीले आँटेका छौं । गररै छाड्छौं ।”
नाम तय नभइसकेको यो चलचित्रको मुख्य पात्र पनि एक जना मात्रै सार्वजपनक गरिएको छ । र, ति हुन्–खगेन्द्र लामिछाने ।
“म बाहिर गएको थिएँ । हिजो बिहान मात्रै दीपेन्द्र जिले भेट्ने काम छ भनेर बोलाउनुभयो । भेट्दा मलाई यो चलचित्रमा प्रस्ताव गर्नुभयो । मलाई पनि तँ अरुको चलचित्रमा काम गर्छैनस् भनेर आरोप लागिरहन्थ्यो । त्यसैले हुन्छ भनेँ ।”
चलचित्रको विषय नै चुनौतिपूर्ण भए पनि उनले आफू यसका लागि तयार रहेको बताए ।
चलचित्र विकासबोर्डका अध्यक्ष राजकुमार राइले देशको प्रतिनिधित्व गर्नसक्ने चलचित्रलाई वोर्डले सहयोग गर्ने बताए । “हामीसँग अहिले १६ करोड रुपैयाँ पैसा जम्मा भएको छ । यस्तै फरक खालका र देशलाई चिनाउने चलचित्रका लागि नै हो त्यो पैसा खर्चिने । धेरै त भन्न सक्तिन । जति सकिन्छ हामी सहयोग गर्न तयार छौं ।”
चलचित्रको छायांकन आउने मंसिर १५ बाट सुरु हुने छ ।