काठमाडौं । अमेरिकी राष्ट्रपति डोनाल्ड ट्रम्पले यसवर्षको विनियोजन विधेयकमा मेक्सिको र अमेरिकाबीचको सीमानामा लगाइने भनिएको पर्खालको शीर्षकमा रकम समावेस नगर्ने भएका छन् ।
वेलयाती पत्रिका गार्जियनका अनुसार अमेरिकी काँग्रेसबाट यही शुक्रबारभित्र पारित गरि सक्नुपर्ने सो खर्च विनियोजन विधेयकमा मेक्सिको पर्खालको खर्च समावेस गरे विपक्षी डेमोक्रेट्स पार्टीले  प्रतिरोध गर्ने  र विधेयक रोक्ने चेतावनी दिएको थियो ।
डेमोक्रेट्स पार्टी तथा रिपब्लिकन पार्टीभित्र यस विषयलाई लिएर असन्तोष रहेको अवस्थामा ट्रम्पले आउँदो सेप्टेम्बरसम्मका लागि स्थगित गर्ने संकेत गरेका हुन् ।
यसलाई अमेरिकी राष्ट्रपतिको कार्यालयले पनि पुष्टि गरेको छ ।  अमेरिकी कन्जरभेटिभ मिडियाकर्मीहरुसँग भएको एक निजी भेटघाटका क्रममा ट्रम्पले यो योजना व्यक्त गरेका हुन् ।
विनियोजन विधेयकमा मेक्सिको पर्खालको खर्च समावेस गर्दा विपक्षीको विरोधका कारण संघीय सरकारलाई जाने बजेट नै रोकिने र खर्च गर्न नपाउने खतरा हुने बताइएको छ ।
ट्रम्पले आफ्नो प्रशासनको १०० औं दिनको अवसरमा आइपर्ने खतरा टार्ने उपायस्वरुप यो निर्णय गरेका हुन् । मेक्सिकोको सीमा पर्खाल लगाउने विषय राष्ट्रपति चुनाव अभियानका बेला ट्रम्पको प्रमुख  चुनावी प्रतिबद्धता थियो ।