काठमाडौं । २०७२ मा नेपालमा भूकम्प आउँदा चीनको स्वायत्त प्रदेश तिब्बतका केही क्षेत्रमा समेत क्षति पुगेको थियो । तर भूकम्पको दुई वर्ष बित्दा भूकम्पले क्षति पुर्याएका तिब्बती क्षेत्रको पुनर्निर्माणको काम पूरा भएको चिनियाँ अन्तर्राष्ट्रिय रेडियोले जनाएको छ । समाचारअनुसार, अहिले तिब्बतको भूकम्पग्रस्त क्षेत्रमा जनजीवन सामान्य भैसकेको छ । 
भूकम्पका कारण तिब्बतका १८ काउन्टी (जिल्ला) का तीन लाख व्यक्तिहरू पीडित भएका थिए । भूकम्पपछि तिब्बत सरकारले राहत र पुनर्निर्माण कार्यलाई युद्धस्तरमा सञ्चालन गरेको थियो । दुई वर्षपछि अहिले भूकम्पग्रस्त क्षेत्रमा पानी, बिजुली र दूरसञ्चार आदि विकास पूर्वाधारहरूको आपूर्ति सहज भएको छ । 
समाचारअनुसार, तिब्बतको चिगाजे सहरले भूकम्पपछिको पुनर्निर्माणका लागि ११ अर्ब युआन खर्च गरिसकेको छ भने दस हजारभन्दा धेरै व्यक्तिका लागि नयाँ घर निर्माण गरिएको छ । यी क्षेत्रमा पर्यटकहरू आउने क्रम बढेकोले मानिसहरूको आयस्रोत वृद्धि भएको छ ।