काठमाडौं । राजनीतिमा मध्यमार्गी मानिने इमेनुएल मेक्रों र केही उदार दक्षिणपन्थी मानिने मरी पेन फ्रान्समा भएको राष्ट्रपति चुनावको दोस्रो चरणमा प्रवेश गरेका छन् । उनीहरूबीच दोस्रो चरणमा तीव्र प्रतिस्पर्धा हुने बीबीसीले जनाएको छ । 

समाचारअनुसार, आइतबार भएको मतदानमा उच्च स्थानमा रहेका मेक्रोंको सात मईमा हुने दोस्रो चुनावमा मरी ल पेनसँग मुकाबिला हुनेछ ।

बीबीसीका अनुसार, विगत छ दशकयता फ्रान्समा भएको चुनावमा मुख्य दक्षिणपन्थी या वामपन्थी पार्टीका उमेदवार दोस्रो चरणमा पुग्न नसकेको यो पहिलो पटक हो । चुनावको पहिलो चरणमा हालसम्म गनिसकिएका ९७ प्रतिशत मतमध्ये मेक्रोंलाई २३.९ र मरी ल पेनलाई २१.४ प्रतिशत मत प्राप्त भएको छ । फ्रान्सको राष्ट्रपति चुनावमा ११ जना उमेदवारहरू प्रतिस्पर्धामा थिए । 

इमेनुएल मेक्रों राजनीतिमा आउटसाइडर (बाहिरी व्यक्ति) मानिन्छन्, किनभने उनको खासक्षेत्र वित्तप्रबन्धन हो । उनी सन् २०१६ सम्म फ्रान्सको समाजवादी सरकारमा अर्थव्यवस्था हेर्ने मन्त्री थिए ।

उनले ‘इन मार्स’ नामक एक राष्ट्रवादी अभियान चलाएका थिए र एक वर्षमै उनी निकै लोकप्रिय बन्न पुगे । उनले १६ वर्षको उमेरमा आफूभन्दा २४ वर्ष जेठी एक जना स्कुल शिक्षिकासँग प्रेमविवाह गरेका थिए । 

मेक्रोंकी प्रतिस्पर्धी मरी ल पेन आठ वर्षकी हुँदा उनको पेरिसस्थित घरमा हमला भएको थियो र यहीँदेखि उनमा राजनीतिक रुचि बढेर गएको थियो । त्यतिखेर उनी पाँच तल्ले घरको छतबाट तल खसेकी थिइन् र एउटा रुखको हाँगामा अड्किएर बाँचेकी थिइन् ।

उनलाई राजनीति र नेशनल फ्रन्ट नामक पार्टीको नेतृत्व उनका पिता ज्याँ मेरी ल पेनबाट विरासतमा प्राप्त भएको बताइन्छ । यसभन्दा अघि २०१२ को चुनावमा पनि उनले प्रतिस्पर्धा गरेकी थिइन् र तेस्रो स्थानमा रहेकी थिइन् ।