काठमाडौं । किंग्स इलेभेन पञ्जाबले दशौं संस्करणको इन्डियन प्रिमियर लिग (आईपिएल) क्रिकेटमा तेस्रो जित निकालेको छ । आइतबार बेलुका भएको खेलमा गुजरात लायन्सलाई २६ रनले पराजित गर्दै पञ्जाबले तेस्रो जित निकालेको हो ।
राजकोटमा पञ्जाबले दिएको १८९ रनको लक्ष्य पछ्याएको गुजरातले निर्धारित २० ओभरमा ७ विकेट गुमाएर १६२ रन मात्र बनाउन सक्यो । गुजरातका लागि दिनेश कार्तिकले अविजित ५८ रन जोडेपनि टोलीलाई जित दिलाउन सकेनन् । त्यस्तै उसका कप्तान सुरेश रैनाले ३२ तथा एन्ड्रयु टेएले २२ रन जोडे । पञ्जाबका सन्दिप शर्मा, केसी करिप्पा र अक्षर पटेलले समान दुई दुई विकेट लिए ।
यसअघि टस हारेर पहिले ब्याटिको निम्तो पाएको पञ्जाबले निर्धारित २० ओभरमा ७ विकेट गुमाएर १८८ रन जोडेको थियो । पञ्जाबका लागि हासिम अमलाले ६५ रनको अर्धशतकीय पारी खेले । त्यस्तै पञ्जाबका अक्षर पटेलले ३४, कप्तान ग्लेन म्याकस्वेलले ३१ तथा शेन मार्शले ३० रन जोडे । गुजरातका एन्ड्रयु टेएले २ विकेट लिए ।
यो जितसँगै ७ खेलमा तेश्रो जित हात पारेको पञ्जाब लिगको चौथो स्थानमा उक्लिएको छ । पराजित गुजरात ७ खेलबाट ४ अंक जोडेर लिगको पुछारमा रहेको छ । लिगमा मुम्बई इण्डियन्स शिर्ष,कोलकाता नाइट राइडर्स दोस्रो र सनराइजर्स हैदरावाद तेस्रो स्थानमा छ ।