काठमाडौं । मनिषा कोइरालाले हालै एउटा अन्तर्वार्तामा क्यान्सरको उपचारपछि उनी ‘एलियन’ जस्तै देखिन लागेको बताएकी थिइन् । मनिषाका अनुसार किमोथेरापीका कारण उनको केश झरेको थियो । मनिषा लामो समयदेखि चलचित्रदेखि टाढा छिन् । तर संजय दत्तमा आधारित बायोपिकमा उनी संजयकी आमा नरगिसको भूमिकामा देखिँदैछिन् । यो चलचित्रमा संजय दत्तको भूमिका रणवीर कपुरले निर्वाह गर्दैछन् । यहाँ हेरौँ भाष्करडटकमको रिपोर्टमा आधारित मनिषाका बारे केही तथ्यः
सन् २०१२ मा मनिषालाई ओभेरियन क्यान्सर भएको थियो
‘सौदागर’, ‘१९४२ः अ लभ स्टोरी’, र ‘बम्बे’ जस्ता चलचित्रमा काम गरिसकेकी मनिषालाई डिसेम्बर २०१२ मा ओभेरियन क्यान्सर भएको थियो । यसपछि उनी अमेरिका गएकी थिइन् । त्यहाँ झण्डै ६ महिनासम्म उनको उपचार भएको थियो । उनलाई आफ्नो लुक (मुहार) का बारेमा चिन्ता रहेको या नरहेको सम्बन्धी प्रश्न सोधियो । उनले आफूलाई केश झरेको थाहा भएको तर आफ्नो लुकका विषयमा निश्चित नरहेको बताएकी थिइन् ।
मनिषाका अनुसार क्यान्सर जस्तो बिमारीसँग संघर्ष गरेपछि त्यसै पनि मुहारमा परिवर्तन अवश्य आउँछ । मनिषा भन्छिन्, “मलाई थाहा थियो क्यान्सरसँग लड्नका लागि मलाई मानसिक रूपमा तयार हुनुपर्छ । र, यसका लागि मलाई परिवारले पूर्ण सहयोग गर्यो । किमोथेरापीपछि मेरो केश र आँखीभौ झरेको थियो । त्यस समय ऐना हेर्थेँ आफैँलाई एलियन जस्तो महसुस गर्थेँ ।” सन् २०१३ मई २ मा मनिषाले पूर्ण रूपमा क्यान्सरबाट छुट्कारा पाइसकेकी थिइन् ।
सलमान र गुलशनले स्वास्थ्य अवस्था बुझे
मनिषा भन्छिन्, “सामान्य अवस्थामा जब कसैलाई क्यान्सर हुन्छ तब प्राइवेसी पर्पज (व्यक्तिगत कारण) ले उसलाई एक्लै छाडिन्छ । ताकि उसलाई केही ठाउँ प्राप्त होस् । यस्तो अवस्थामा मैले पनि आफूलाई दुनियाँबाट अलग गरेकी थिएँ । यद्यपि मेरो परिवारले मलाई भनिरहन्थ्यो, चलचित्रसँग जोडिएका कोको मेरो स्वास्थ्य अवस्था जान्न चाहन्छन् । मलाई थाहा छ, त्यो समयमा सलमान खान र गुलशन ग्रोबरले मेरो बिमारी अवस्था र सुधारका बारेमा जानकारी लिएका थिए ।”
मनिषाका अनुसार फिटनेसका लागि उनी रातमा चाँडै सुत्ने र बिहान चाँडै उठ्ने चक्रलाई पछ्याउँथिन् । “म रातमा १० बजेसम्म सुतिसक्छु र बिहान साढे ४ बजे उठ्छु । बिहान साढे ७ बजे मेरा योगा गुरु आउँछन् । उनीसँग म ध्यान, प्राणायाम र केही आसन सिक्छु । यसपछि ११ बजे म आफ्नो काममा लाग्छु । भोजनलाई लिएर म कठोर छु । म ९९ प्रतिशत शाकाहारी भोजन लिन्छु ।”
मनिषाले सन् १९८९ मा नेपाली चलचित्र ‘फेरि भेटौँला’ बाट करियर सुरु गरेकी थिइन् । यद्यपि उनको पहिलो बलिउड चलचित्र ‘सौदागर’ थियो । जुन १९९१ मा रिलिज भयो । यसपछि उनले ‘यलगार’, ‘अनमोल’, ‘धनवान’, ‘मिलन’, ‘संगदिल सनम’, ‘क्रिमिनल’, ‘गुड्डु’, ‘अग्निसाक्षी’, ‘इन्डियन’, ‘खामोशी’, ‘गुप्त’, ‘कारतुस’, ‘मन’, ‘हिन्दुस्तान की कसम’, ‘लज्जा’, ‘मोक्ष’, ‘कम्पनी’, ‘मार्केट’ र ‘भूत रिटन्र्स’ जस्ता चलचित्रमा काम गरिन् ।
मनिषाले ‘सवाल दस करोडका’, ‘लार्जर देन लाइफ’ (डकुमेन्ट्री) र ‘फेमिना मिस इन्डिया २०१५’ (निर्णायक) मा पनि काम गरिन् ।