काठमाडौं । द्ुई वर्ष भित्रमा तीन बस्ती उभ्याएका सिताराम कट्टेल धुर्मुसलाई काठमाडौंको मेयरमा चुनाव लड्न सर्वसाधारणको दबाब परेको छ ।
“भूकम्प–पीडितको घाउमा थोरै किन नहोस् मल्हमपट्टि लगाएकाले होला सामाजिक सञ्जालमा, धेरैले फोनमा र कतिपयले भेटेरै आग्रह गर्छन्– स्वतन्त्रबाट तपाईं काठमाडौँका मेयरमा उठ्नूस्,” धुर्मुसले बाह्रखरीसँग कुरा गर्दै भने, “जहाँबाट उठे पनि निर्वाचन जित्नुहुन्छ तपाईं भनेर भन्नेहरू पनि असंख्य छन् । राजनीति विकासको साधक बन्न नसकेको, व्यवस्थाले विकासको वाधक पन्छाउन नसकेको देखेकाले उहाँहरूमा हामीप्रति आशा, भरोसा छ । तर, हामी पार्टीको, स्थान विशेषको होइन, देशको बन्न चाहन्छौँ । मेयर बन्ने इच्छा, आकांक्षा छैन । हामी पार्टीको होइन, देशकै झन्डा बोकेर हिँडन् चाहन्छौँ ।”
उनले पहिलो संविधानसभामा पनि मतदान नगरेको स्मरण गरे । “पहिलो संविधानसभामा मतदान दिइएन । संविधान जारी गर्न नसक्दै संविधानसभा विघटन भएपछि एकमनले सोचेँ– मत नहालेर ठीकै गरिएछ । अभिमतको उपेक्षा गरेको होइन, राजनीतिक दलले अपेक्षाकृत काम गर्न नसकेको आक्रोश थियो त्यो, ” उनले भने, “यतिमात्र होइन हामीले संविधान नबनी संविधानसभा विघटन गरेको आक्रोशमा काजकिरिया नै गरेका थियौँ । म कुञ्जना, केदार घिमिरे ‘माग्ने बूढा’, सुरज चापागाईं ‘बान्द्रे’ हामीले छाकै छाड्यौँ ।”
उनले आफूसहित कुन्जना घिमिरेको पनि मतदाता नामावलीमा नाम नभएको बताए ।
“भूकम्पपछि पुनःनिर्माणमा खटिएकाले यसपटक पनि भोट लिस्टमा नाम छुटेछ,” उनले भने, “कुञ्जना र मेरो दुवैको नाम मतदाता नामावलीमा छैन । यसबीचमा हामी निर्वाचन आयोगमै गयौँ तर, समय सकिएकाले नाम दर्ता हुँदैन भन्ने जवाफ पाएपछि फर्कियौं । हामी वास्तवमै दुःखी छौँ, २० वर्ष पछि हुन लागेको स्थानीय निर्वाचनमा सरिक हुन पाइएन ।”