काठमाडौं । प्रधानमन्त्री पुष्पकमल दाहालले गृह मन्त्रीको ट्वीटका पछाडी नलागेर चुनावी सुरक्षा चुस्त पार्न सुरक्षा निकायका प्रमुखहरुलाई निर्देशन दिएका छन् ।
प्रधानमन्त्री दाहालले चारवटै सुरक्षा निकायका प्रमुखहरुलाई प्रधानमन्त्री निवास बालुवाटारमा बोलाएर तोकिएकै मितिमा निर्वाचन हुनेमा आशंका नगर्न भन्दै सोही अनुसार सुरक्षा व्यवस्था चुस्त पार्न निर्देशन दिएका हुन् ।

उनले सरकारका जिम्मेवार मन्त्रीहरुले नै निर्वाचनका बारेमा गरेको हल्लाका पछि नलाग्न पनि निर्देशन दिएको सचिवालय स्रोतले जानकारी दियो ।

“सरकारमै भएका केही मन्त्री र जिम्मेवार व्यक्तिबाटै चुनावबारे फरक धारणा आएका छन्, त्यसको पछाडी लाग्दै नलाग्नू, हामीले त्यसलाई चिर्दै तोकिएको समयमा शान्तिपूर्ण तवरले निर्वाचन सम्पन्न गर्नुपर्छ । त्यसकै तयारीमा जुट्नू भन्ने प्रधानमन्त्रीको निर्देशन थियो,” सचिवालय स्रोतले भन्यो, “देशैभरी निर्वाचनको माहोल खडा भएका बेला जिम्मेवार व्यक्तिबाट आएका अभिव्यक्ति सबैले अर्थपूर्ण रुपमा हेरेका छन् ।  त्यसैले यस्ता चुनौतीलाई ध्यानमा राखेर सुरक्षा व्यवस्थामा कुनै कसर बाँकी नराख्नू ।”

प्रधानमन्त्रीसँगको भेटमा सुरक्षा निकायका प्रमुखहरुले आफ्नो संगठनले गरेको तयारी र वर्तमान सुरक्षा अवस्थाका बारेमा जानकारी गराएको पनि स्रोतले जानकारी दियो । भेटमा सुरक्षा निकायका प्रमुखहरुले निर्वाचनको समय आउनै लाग्दा समेत निर्वाचनमा आवश्यक पर्ने स्रोत साधन नआएको भन्दै काम गर्न समस्या भएको भन्दै प्रधानमन्त्रीको ध्यानाकर्षण गराएका थिए ।

सुरक्षा व्यवस्थालाई चुस्त बनाउन सुरक्षा गोष्ठी
यसैबीच सुरक्षा व्यवस्थालाई चुस्त बनाउन गृह मन्त्रालयले क्षेत्रीय स्तरको सुरक्षा गोष्ठीहरु गर्दै आएको छ । अहिलेसम्म विराटनगर, धनगढी, नेपालगन्जमा गोष्ठी सम्पन्न भएको छ भने बुधबार पोखरामा हुँदैछ । त्यसपछि सिमरामा गर्ने तयारी भएको गृह मन्त्रालयले जनाएको छ ।

यस्तो छ चुनावी सुरक्षा व्यवस्था
गृह मन्त्रालयले निर्वाचनका लागि करिब २ लाख ३१ हजार सुरक्षाकर्मी परिचालन गर्ने योजना बनाएको छ ।  नेपाल प्रहरी, सशस्त्र प्रहरी बल, राष्ट्रिय अनुसन्धान र नेपाली सेना गरी चार वटै सुरक्षा निकाय परिचालन हुनेछन् ।
यस्तै निर्वाचनमा ७५ हजार म्यादी प्रहरी परिचालित हुनेछन् । त्यसका लागि अहिले उनीहरुलाई तालिम दिने काम चलिरहेको छ । पहिलो घेरामा नेपाल प्रहरी, दोस्रो घेरामा सशस्त्र प्रहरी बल र तेस्रो घेरा र निर्वाचन सामाग्री तथा मत पेटिका ढुवानीका लागी नेपाली सेनालाई जिम्मेबारी दिने गृहले तयारी गरेको छ । 
गृहमन्त्रीको ट्वीटले सबैलाई तर्सायो 
आईतबार बिहान भएको राज्य व्यवस्था समितिको बैठकमा कुनै पनि हालतमा निर्वाचन गराएरै छाड्ने र चुनाव हुन दिँदैनौ भन्दै हिँड्नेलाई कारबाही समेत गर्ने भनेका गृह मन्त्री विमलेन्द्र निधीले त्यही राति सामाजिक सञ्जालमा चुनावका लागि प्रयाप्त तयारी नभएको भन्दै ट्वीट गरे  । यसले सुरक्षा निकाय नै तयारी अवस्थामा नरहेको भन्ने सन्देश जान सक्ने भन्दै सबैलाई आश्चर्यचकित बनायो ।