काठमाडौं । बेलायती संसद्ले एक प्रस्ताव पारित गर्दै गिलगिट–बाल्टिस्तान भारत अधीनस्थ जम्मू काश्मीरको भाग रहेको र पाकिस्तानले यसमाथि जबर्जस्ती आधिपत्य जमाएको बताएको छ ।

उक्त प्रस्तावमा गिलगिट–बाल्टिस्तान पाकिस्तानको पाँचौं प्रान्त हो भन्ने इस्लामाबादको दाबीलाई अस्वीकार गरिएको छ । ‘आज तक’ टेलिभिजन च्यानलका अनुसार प्रस्तावमा भनिएको छ, ‘‘पाकिस्तानले त्यस्तो भूभागमा कब्जा जमाएको छ, जुन उसको होइन । यस क्षेत्रको जनसङ्ख्या वितरणमा कुनै किसिमको परिवर्तन गरियो भने विवादित क्षेत्रमा तनाव उत्पन्न हुन सक्नेछ ।’’

 उक्त प्रस्तावलाई मार्च २३ मा कन्जरभेटिभ पार्टीका नेता बब ब्ल्याकम्यानले टेबुल गरेका थिए । प्रस्तावमा अगाडि भनिएको छ, ‘‘गिलगिट–बाल्टिस्तान भारत अधीनस्थ जम्मू कश्मीरको वैधानिक भूभाग हो । यसलाई पाकिस्तानले सन् १९४७ देखि जबर्जस्ती अधीनमा पारेको छ र त्यहाँका जनताको आधारभूत अधिकारको बेवास्ता गर्दै उनीहरूको वाक्स्वतन्त्रतामाथि समेत बन्देज लगाएको छ ।’’ 

पाकिस्तानका बलुचिस्तान, खैबर पख्तुनख्वा, पन्जाब र सिन्ध गरी चारवटा प्रान्त रहेका छन् । निकट भविष्यमै पाकिस्तान सरकारले गिलगिट–बाल्टिस्तानलाई पाकिस्तानको पाँचौं प्रान्त घोषणा गर्ने तयारी गर्दैछ । 

भारतले चाहिँ १९४७ मा बेलायतबाट स्वतन्त्रता प्राप्त भएयतादेखि नै गिलगिट–बाल्टिस्तानलाई ऐतिहासिक र भौगोलिक आधारमा आफ्नो भूभाग बताउँदै आएको छ ।

त्यतिखेर बेलायत राज्यको सीमाअनुरूप नै भारत र पाकिस्तानको विभाजनको शर्त तय भएको थियो । उक्त पृष्ठभूमिमा बेलायती संसद्बाट पारित यो प्रस्ताव भारतीय पक्षको हितमा रहेको र यसले दूरगामी महत्त्व राख्ने समाचारमा उल्लेख छ ।